Нурият Кожаева
Дагестан Аькимбасы ДР Халк Йыйынына каратылган Язбасы ман шыгып соьйледи. Ол оьзининъ язбасында билимлендируьв тармагына уьйкен эс этти. Буьгуьн билимлендируьв республикамыздынъ социал-экономикалык оьрленуьвининъ негизли майданы болады. Регионымызда билимлендируьв сапатлы болсын деген ниет пен, уьйкен куллык этилинген эм этилинеди. Дагестан салынаяткан янъы мектеблери эм балалар бавлары ман, солай ок капиталлык ярастырув этилинетаган мектеблер саны ман алдышы орынларды алады.
Ногай районында да бу тармак бойынша заьлимдей куллыклар юритиледи. Билимлендируьв учреждениелерине меканлар курылувы акында билимлендируьв боьлигининъ методисти Байрамали Бекмурзаев хабарлайды: «Ногай районында уьш мектеб меканлары салынаятыр: Батыр-Мурза эм Кумлы авылларында – 100 окувшыга, Шумли-Олик авылында – 200 окувшыга эсапланып. Батыр -Мурза авылындагы курылыс 2021-нши йылда басланган эм 2024-нши йылда тамамланмага керек. 2022-нши йылда салынып басланган Кумлы авылындагы мектебтеги куллыклар тамамланув уьстинде. Бу куьнлерде мунда мектеб азбарын ясылландырув, ерге тротуарлы плиталар тоьсев бойынша куллыклар юритиледилер. Шумли-Олик авылындагы 2023-нши йылда курылып басланган мектеби 2025-нши йылда кулланувга берилмеге тийисли».
Коьп йыллар узагына республикамыздынъ ортак билимлендируьв учреждениелери китаплер етпегени мен байланыслы маьселелер орын тапкан. 2023-2024-нши окув йылларында билимлендируьв боьлик методисти Секерхан Оразбаева билдиргенлей, Ногай районынынъ мектеблерине 1-6-ншы класслар окувшыларына – тувган тил эм абадиат окув сабаклары, 11-нши класслар окувшыларына тарих сабагы бойынша, солай ок 6-8-нши класс окувшыларына Дагестаннынъ тарих сабагы бойынша китаплер берилди. Эки янъы Кумлы эм Батыр-Мурза авылларынынъ мектеблерине 2815 китап алынган.
