Магомед Рамазанов Дагестан Республикасынынъ Оькиметининъ Председатели этилип беркитилуьви тек кадрлык туьрленис болып калмайды, политикалык эм экономикалык оьрленуьвди, дуныя ярыгын коьрген, туьрли тармакларда ис сулыбы болган инсанга сеним этилген йигерли абыт болады.
Бу куьн «кесек заманга исин юритуьвши» деген атын «толы ыхтыярлы» дегенге авыстырган Магомед Рамазановтынъ алдында уьйкен мырсатлар ашылдылар.
Онынъ ис сулыбын эсапка алып, янъы премьер-министрден коьп янъылыкларды куьтемиз.
Ясыртын зат тувыл, республикамыз йогары дотациялык эм бизде, савда ман каьр шегип, бир ерде де сол аьрекетин коьрсетпейтаганлар бар, сол зат та закон ман келисте тувыл, эм патшалыкка олардан келетаган пайда да йокка эсап, сога коьре, сондай аьллерди де, предпринимательлик секторларды да, киши савдады «туншыктырмай» тергев керекли болады.
ДР Оькиметининъ Председателин бир тавыстан сайлав сейирди калдырмай болмады, ДР Аькимбасынынъ исин кесек заманга толтырувшы Федор Щукин эм парламент тилбирлигин коьрсеттилер – 81 тавыстан 81-де Магомед Рамазановтынъ кандидатурасы уьшин разылыгын билдирдилер.
Энди онынъ алдында борышлар аз тувыл, Магомед Рамазановка министрлер кабинетин «ясартув» уьшин толы эркинлик те берилди.
Сол амал ман да янъы сайланган аьким тийисли, аьдилше пайдаланар деп сеним этким келеди, неге десе, оьпке-багана болмасын, бизим кишкей аталыгымызда «бирев янынъ, бирев коьзинъ», куданъ, ювыгынъ (республикамыздынъ бас каласында тувыл экеш, бизим кишкей еримизде де сондай затлар ман расамыз), бас деп оларды ис орынларга ерлестирмеге керек деген бир токтастырылган кагыйдадай болып калган.
Магомед Исрафил увылы Рамазановтынъ беркитилген ис орынында борышларды толтырув енъиллерден тувыл, республикамызда маьселелер де, шешилмеге керек соравлар да аз да тувыл: турак-коммуналлык, ямагат, аьел, яшав аьлин онъайлы этуьв шартлары…
Аьли уьшин янъы премьер-министрдинъ алдында бас борыш– ведомстволар етекшилерин беркитуьв: ким оьз орынында калады, ким кетеди.
Г.Сагиндикова.