Туьнегуьн Дагестанда маьнели йолгыс болып озды: республика Аькимбасы Сергей Меликов ямагат ваькиллери, журналистлер эм блогерлер мен ашык диалог аркасы ман аьллести.

Бу оьзгерис тек регион уьшин тувыл, савлай элимизге уьйкен маьнелиги бар, неге десе ол авыр чрезвычайный аьллерде власть пен ямагаттынъ биргелес аьрекет этуьвдинъ янъы дережесин коьрсетти.
Йолыгыс ашык эм сенимлик аьллеринде оьтти. Сергей Меликов авыр ава шартлары ман туьзилген аьллер мен байланыста берилген оьткир соравларга да ашык яваплады: онынъ белгилеви мен, чрезвычайный аьллер тамамланмаган, тек баска районларга йылыстырылган. Ашыктан-ашык туврадан соьйтип соьйлеви яваплылыктынъ йогары дережеси эм аьрекет этпеге аьзирлиги акында айтады, а онынъ регионда туьзилген баьле-казадынъ калдыкларыннан коьплеген яшавшылар аьли де кыйналатаган аьллеринде уьйкен маьнелиги бар.
Сергей Меликов республика алдында туратаган маьселелер акында ашык аьлде хабарлады. Айтпага, ол документлерди кеплев мен байланыслы авырлыклар акында эм энергопрограммады финанслав токтатылганын эске алды. Берилген соравларга соьйтип ашыктан-ашык яваплавы кризис аьллеринде басшылавга власть яваплылы карайтаганын белгилейди.
Регион аькимбасы солай ок яваплылы ис орынлардагы аьдемлердинъ вайымсызлыгына эс каратты, олардынъ аьрекетшилигине суд ягыннан баа бермеге керегин белгилеп. Онынъ «аьрекетлигин яде аьрекетсизлигин 100% ясырмага аян шалысувлар йок» деген соьзлери бу туьзилген аьллерде «мергинлерсиз» (куьналилерсиз) ызына шыкпага ниетлигин шайытлайды, айырым сый этуьвге тийисли болып. Йолыгыстынъ маьнели вакыты сол: власть орын тапкан маьселелерди ортага салып ойласувдан баска, олардынъ шешуьв йолларын белсенли излестируьвде де токталды. Бу зат куьн аьлиндеги авырлыкларды басыннан тайдырув уьшин республика ийги практикаларды эм билимлерди кулланмага шалысатаганы акында айтады. Оннан баска болып, турак уьйге документлери йокларга туьрли як коьмек этуьв тармагы туьзилген. Коьмек этуьв методикасына киргистилген бу янъылыклар власть туьрленетаган аьллерге эм гражданлардынъ керексинуьвлери мен байланыста аьрекетлемеге аьзирлигин коьрсетеди. Мамедкаладан коьмек этуьв акында тилек туьскени эфир заманында айтылганына явап оперативли эм аьдемшиликли эди. Ол тек кеспиликти тувыл, властьтинъ аьдемлер керексинуьвлерине языксынув ман карайтаганын белгилейди. Сергей Меликов аян заман режиминде куллык этип, туьзилген аьллерди тергеви астында тутып, толтырувшы властьтинъ баьри дережелирин яшавшыларга коьмек этуьвге онълавы бек маьнели.
Республикада туьзилген аьл авыр болып кала береди: кайбир районларда чрезвычайный аьл билдирилген, туьзликте сув алган ерлер бар, а тавларда – лавиналар эм уьйкен карлар. Ондай аьллерде республикадынъ баьри яшавшыларынынъ куьшлерин бирлестируьвдинъ уьйкен маьнелиги бар
Туьнегуьн болып озган ашык диалог дагестанлылар оьзлерининъ тынышсызландыратаган соравларына яваплар алып, власть аьрекетлемеге аьзир экенин коьруьвде керекли абыт эсабында болды. Сергей Меликовтынъ ямагат пан йолыгысувы власть эм гражданлар ара сенимлик болып, бир-бирисин анълавда – бек маьнели абыт. Ашыклык, диалогка аьзирлик эм белсенли аьрекетлик – бу баьри зат куьн аьлиндеги авырлыкларды енъмеге сенимлик береди. Бу енъил тувыл заманларда тек ортак куьш пен баьле-каза калдыкларын тайдырмага эм республикада ийги яшавды тургыстпага болатаганды эске саклав бек маьнели.
Эльмира Кожаева, «Шоьл тавысы» республикалык газетасынынъ бас редакторы.