А.Асанов атындагы Нариман авыл мектебинде яс несилди патриотлык яктан тербиялав бойынша 5-нши класслардынъ класс етекшилери Элина Мурзаева эм Муслимат Арсланова СВО ветераны Рустам Магомедовтынъ катнасувы ман Эрклик дерисин озгардылар. Окувшыларга бу куьнлерде бизим йигитлер СВО барысында кыйын аьллерде тынышлык уьшин куьресетаганын эм сол тынышлыкты саклавдынъ уьйкен маьнесин анълатув – йолыгыстынъ мырады болды.
Сыйлы конак пан окувшыларды окытувшы Элина Залимхановна таныстырды, ол кыскаша баьтирдинъ аьскер йолы акында хабарлады.
– Рустам Магомедов 51-нши армиядынъ «Центр» группировкасынынъ 5-нши штурм бригадасындагы танк батальонында механик-водитель куллыгын юриткен. Ол украин нацистлериннен Красногоровка эм Курахово, Острая эм Островское авылларын босатувда катнаскан.
Островское авылын алмага кирген танклардынъ сырасында энъ де бириншисин бизим ердесимиз айдаган. Ердесимиздинъ эм онынъ аьскер йолдасларынынъ согыс борышларын толтырувы акында телеберуьв орталык телевидениесинде коьрсетилген. Йигитлиги уьшин Рустам Магомедов «За боевые отличия», «За взятие Красногоровки», «За взятие Курахово», 2-нши дережели «За храбрость» медальлери мен савгаланган», – деди Элина Мурзаева.
Муслимат Арсланова Рустам Магомедов Уллы Аталык согысынынъ ветераны, атайы Магомед Магомедовтынъ баьтир йолы ман барып, ондай болып нацизм мен куьрескенин белгиледи.
Сыйлы конак согыс спецоперация озган ердеги иси, согыс йолдасларынынъ элине эм бир бирине алаллыгы, бирге оьткен сынавлар акында айтты. Бизим ердесимизге бир неше кере оьзининъ янаяткан танкын кавыфсыз ерге коьширмеге туьскен. Ол оьзининъ яшавын сынавга салып, «темир атын»
куткарган. Сосындай явга карсы турган тыныш болмаган заманларда, танклар кайдай оьлшемде керекли болганын бизим баьтир анълайды. Сога коьре де
ол янаяткан танкын амал тавып, бир де таслап кетпеген. Оьзек те, оны шыгара алмаган, айлак та авыр аьллер де болган.
Окувшылар уьйкен кызыксынув ман баьтирди тынъладылар. Олардынъ коьзлеринде баьтирердесимизге каратылган сый аян коьринди. Рустам Оразбаевичтинъ хабарыннан сонъ, балалар ога соравларын бердилер.
Оларга баьри зат та кызыклы эди. Рустам Магомедов патриотлык эм баьтирликтинъ шынты маьнесин анълатар ниетте, окувшылардынъ аьр бир соравына тийисли соьзлер тавып яваплады.
Муслимат Арсланова сыйлы конакка заман тавып мектебке йолыгыска келгени уьшин, балаларга эр кисиге келисли касиетлер, шынты йигитлик акында айтканы уьшин разылыгын билдирди. Мундай йолыгыслар бек пайдалы. Олар яс несилге СВО барысында болган оьзгерислер акында китаплерден яде билдируьвлерден билип калмай, оьз коьзи мен коьрген эм юрегиннен оьткерген согыс спецоперация катнасувшыларыннан эситпеге амал береди.
Нурият Кожаева.
Суьвретте: йолыгыс мезгили.