Окытувшыдынъ иси аьр бир аьдемнинъ яшавында маьнели орынды тутады. Олар тек билим берип калмайдылар, аьдемди кеплендирмеге, зейинлигин аянламага, оьз йолын таппага ярдам этедилер. Окытувшыдынъ каьмбиллигине, шыдамлыгына яс несиллердинъ келеектегиси бойсынады.
Окытувшылардынъ байрам куьнинде Халк яратувшылык орталыгында коьнъиллерди коьтерген, окытувшыдынъ исининъ йогары баасын коьрсеткен бир аьлемет шара озды. Мунда педагогикалык исининъ ветеранлары, мектеб етекшилери, окытувшылар йыйылдылар. Оларга бу куьн – йылы йоравлар, кутлавлар, ак юректен шыккан разылыклар, гуьл байламлар.
Сыйлы окытувшыларды биринши болып Ногай район аькимбасы Джамалутдин Эсиргепов кутлады.
– Окытувшыдынъ иси танълыкты, баалы сулыпты, исине эм балаларга каратылган уллы суьйимди талаплайды. Ногай районынынъ окытувшыларында сондай касиетлер бар. Бу куьнги окувшылар тезден районымыздагы танълагы яшавды, онынъ онъайлыгын туьзееклер. Сога коьре, бу куьн сизинъ дерислеринъизде бизим келеектегимиз кепленеди. Уьйкен разылык сизге аьр бир балага эс этип, оларга уьстинликли, танъ юрекли, тувган ерин эм Элин суьетаган аьдемлер болып оьспеге эткен коьмегинъиз уьшин, – деди Джамалутдин Эсиргепов.
Оннан сонъ аявлы эм каьмбил окытувшыларга оьз йоравларын билимлендируьв боьлик етешиси Амирхан Межитов, Ногай район Депутатлар Йыйынынынъ председатели Алибек Менласанов, Ортакроссиялык билимлендируьв профсоюзынынъ Ногай районындагы организациясынынъ председатели Арслан Бакиев, окытувшы ветеранлар атыннан балаларга билим эм тербия беруьв исине оьзининъ 45 йылын багыслаган Зухра Мавлимбердиева айттылар.
Эндиги шарадынъ оьзеги – окытувшыларды савгалав мезгили етти. Бу куьн «Отличник образования РД» коькирек белгиси мен Орта-Тоьбе авыл мектебининъ окытувшысы Авана Зарманбетова, Калинин авыл мектеб окытувшысы Эмилия Абдулгапова, Кумлы авыл мектебининъ окытувшылары Зульфира Сатырова эм Альжанат Аджатаева савгаландылар. Ийгилердинъ ийгилерининъ иси бу куьн коьплеген Сый грамоталар ман белгилендилер.
Н.Кожаева.
Суьвретте: савгалав мезгили.