Байлыгымыз – оьнерли саьбийлер
Бизим энъ де уьйкен суьйиниш – балалар. Олардынъ куьлкиси, айткан соьзлери бизге куьезли эм сагынышлы. Белгили совет окытувшысы, язувшысы В.Сухомлинский айткан: «Аьр бир баладынъ янында коьринмейтаган кыллар бар. Эгер оларды уста кол ман козгаса, кыллар ярасык болып шалынар».Соьйтип, оьнерли баладынъ юрегиндеги оьнерди, сезимлерди аянлап тек шынты окытувшылар боладылар.
Янъыларда Дагестан патшалык окытувшылык университетинде «Гамзатов окувлары – 2026» яс яттан окувшылардынъ республикалык конкурсынынъ енъуьвшилери эм катнасувшылары савгаландылар. Республикамыздынъ маданият яшавында маьнели оьзгерис белгили язувшылардынъ эм шаирлердинъ яратувшылыгы ман кызыксынатаган талаплы балаларды йыйнады. Боьтен де куванышлы – солардынъ арасында бизим районнан саьбийлер болганы.

Биринши орынды «кара соьз» номинациясы бойынша 3-нши класстынъ окувшысы Эмир Каракаев алды, ол Гульфира Бекмуратовадынъ «Куьз – согыс» деген хабарын окыды эм жюри катнасувшыларын артистизм мен эм хабардынъ маьнесин анълав ман сукландырды. Солай ок, «поэзия» номинациясы бойынша уьшинши орынды Залина Кульчиева алды, ол белгили язувшы Расул Гамзатовтынъ «Зарема» деген ятлавын окыды. Конкурска окувшыларын А-Х.Джанибеков атындагы мектебтинъ окытувшысы Г.Хозбулатова аьзирлеген, онынъ окувшылары туьрли конкурсларда баргылы орынды аладылар. А-Х.Джанибеков атындагы мектебтинъ 4-нши классынынъ окувшысы Амина Магомедова «драматизация» номинациясы бойынша ненец халк эртегисин окып, уьшинши орынга тийисли болды. Окытувшысы А.Менглиязовадынъ айтувы ман, Амина ийги этип окыйды, коьп кызыксынувлары бар, художестволык эм илми адабиятты окыйды, бийимеге, ясамага суьеди. Коьплеген олимпиадаларда, конкурсларда Амина катнасады. Биз окытувшыларды эм олардынъ оьнерли тербияланувшыларын енъуьвлер мен кутлаймыз эм алдыда аьли де коьп бийикликлер йораймыз.
Г.Бекмуратова. Суьвретлерде: Эмир Каракаев эм Залина Кульчиева; Амина Магомедова.