Уьстимиздеги йылдынъ ноябрь айынынъ ишинде, Ногай патшалык театры элимиздинъ бас каласы Москвада болып келди. Бу йол уьйкен кала яшавшыларына ногайымыздынъ патша хатыны Суюмбикединъ яшав йолын коьрсеткен театраллык постановкасын карамага мырсат берилди. «Суюмбике атым, ногай затым…». Тарих бу кыскаяклыдынъ атын бек аьруьв биледи эм таныйды… Етекшилев, кыйналув эм кайгырув. Аьр кайсы сезим де юрегиннен эм басыннан оьткен кыскаяклы… Буьгуьн соны биз художестволык кебинде, театр сахнасында коьремиз. Ногай патшалык театрынынъ актерларынынъ ойнавында коьнъилимизге етеди. Не шаклы поэтикалык сыдыралар аьр бир актердынъ авызыннан усташа, терен сезимлер мен шыгадылар. Оьзим бу постановкады тувган-оьскен еримизде караганман. Алыстагы ногай халкым аьли сога шайытлык этти. Москвадынъ Россия патшалык социаллык йогары окув ошагы ерлескен меканында «Суюмбике. Шоьл кызы» спектакли коьрсетилди. Мунда тилимизди анълаган, тарихимиз бен таныс аьдемлер конак болдылар. Аьр кайсысы – спектакльди караган аьдем, келгенине оькинмеди. Ногай патшалык театрынынъ актерлары ман бирге каравшылар Суюмбикединъ яшав йолын оьттилер: кишкей увылы ман тул хатын болып калувы, зорланувы … Коьзясларды актырды. Бас геройынынъ келбетин ойнав, онынъ сезимлерин каравшыга еткеруьв – тыныш тувыл, а бизим бу куьнги спектакльдинъ бас келбети Суюмбикединъ сезимлер каравшысына толы аьлде еткенин онынъ (каравшыдынъ) коьзининъ сукланувы коьрсетти. Ногай патшалык театрынынъ куллыкшыларына каратып айтылган соьзлер, йылы йоравлар – аьр кайсысы уьйкен савкат эм актерларга, бу ис коллективти етекшилеген Гульфия Кокоевага тек алдыга ымтылмага, оьспеге дем де беруьвши булак болады. Москва Ногай патшалык театрын сыйлап, хош коьрип алды. «Суюмбике. Шоьл кызы» спектакли Абудин Нурлубаевтинъ «Суюмбике» йырын занъыратып йырлавы ман тамамланды. Халкымыздынъ патша кызы Суюмбике, буьгуьнги маданияты, талаплы актерлары эм артистлери уьшин – оьктемлик. Аллы ясын шоьлигимизде тувып-оьскенлер, буьгуьнлерде Москва кала яшавшылары спектакльден, юректинъ терен сезимлери козгалып, шоьлимиздинъ мыс кокыган ювсанын ийискелегендей болып, толы коьнъил мен кайттылар. Ногай патшалык театрынынъ алдында борышлар аз тувыл, олардынъ кайсы йолы да шоьлден басланады эм сога кайтады… Галима Курганова. Суьвретте: Ногай патшалык театры Москва калада.