Янъыларда окувшылар ман Кизляр районынынъ Неврасовка авыл окув ошагында мектеб выпускниги, согыс спецоперация катнасувшысы Басир Раджабов пан «Классные встречи» Савлайроссиялык Бириншилер козгалысынынъ проекти бойынша кызыклы йолыгыс уйгынланып озгарылды. Мектебте окув йылларында окытувшылар эм онынъ тенъ йолдаслары Басирди, касындагыга дайым ярдамга келмеге аьзир болган, яваплы эм танъ аьдем этип эслеринде саклайдылар. Тувган мектебинде кепленген сол касиет сапатлары негизинде онынъ келеектеги яшав йолы да туьзилди. Мектебтен сонъ, Басир Ромозанович оьз яшав йолын аьскершилик службасы ман байланыстырган. 2021-нши йылдынъ караша айынынъ 3-нши куьнинде ол Россия Федерациясынынъ Савытлы Куьшлери сырасына эр борышын толтырувга шакырылды, а соннан бир айдан сонъ, Коршалав министерствосы ман службасын оьтуьвге контракт беркитеди. 2022-нши йылдынъ навруз айыннан алып Басир Раджабов сайлаган йолында берген антына алаллык, йигитлик коьрсетип, согыс спецоперация юретаган ерде Аталыгынынъ кызыксынувларын коршалап келеди. Аьскершилик службасын оьтуьвде Басир Ромозанович туьрли патшалык эм ведомстволык савгалары ман, айтпага, Йигитлик ордени, «За боевые отличия» эки медали мен, «Участнику специальной военной операции» савгасы ман белгиленген. Сол савгалардынъ аьр кайсысы да ястынъ йигитлиги эм эли алдында коьрсеткен йигитлиги мен сыйга тийисли болувына шайытлав болады. Тувган мектебинде оьткен йолыгыста Басир Ромозанович окувшыларга оьзининъ йыйган бай сулыбы, аьскершилик службасы акында хабарлап, олардынъ кызыксынган соравларына яваплады. Сол куьн окувшыларга СВО катнасувшысынынъ авызыннан шынты эм аьдил хабарларын эситпеге амал берилди. Йолыгыстынъ барысында йигит яс, окувшыларга тек аьскершилик службасы акында хабарлап калмай, яшав баалыклары, аьел, яваплылык эм аьдемнинъ ян-акыл куватлыгы акында да айтты. Кенъесуьв терен эм маьнели болып оьтти. Сондай йолыгыслар, тек хабарласув болып калмай, шынты аьдем бактылары, тарихлери акында эситпеге, Элинъе суьйим, яваплылык, намыс деген сапатлары бек маьнели экенин сезбеге эм анъламага амал береди. Сондай оьзгерислер – аьр бир тапшырылган савгадынъ эм аьр кайсы тийисли казанылган аттынъ артында, Аталыгына кызмет этуьв йолында коьрсеткен коьримли уьлгиси мен коьнъиллендиретаган аьдем туратаганы акында эске салады.

  Суьвретте: шарадынъ барысыннан коьринис.