Яздынъ биринши куьнинде Нариман авылындагы «Шолпан» балалар бавында саьбийлер уьшин завыклы байрам уйгынланды. Бу куьн авылдынъ кишкей яшавшыларына, оларды кайтип куьшли суьетаганларын эм аьдуьвлейтаганларын, тагы да сезбеге амал бердилер. Тербиялавшылар балалар бу байрамды коьп заманга эсинде сакласын деп, коьп куьш салдылар.
Балалар бавына киргенлей ок байрам аьли сезиледи, туьрли туьсли шарлардан арка ясалган, онынъ касында эртегилерден келген конаклар балаларды куьтип турылар. Сонъ олар саьбийлер мен бирге ойнадылар, завыклы йырлар йырладылар, юмаклар шештилер, сыхырлыктынъ дуныясына коьштилер. Бу кишкей элде завыклы базласлар да оьттилер, байрам иелери туьрли борышларды толтырып, тагы да куьшли кувандылар. Бу куьн биювлерсиз оьтпеди, балалар бир-бирине завыклы коьнъил савкатлап, бийидилер. Олардынъ наьсипли коьзлери «Шолпан» балалар бавындагы байрам эстен кетпес аьлде оьткенин ыспатладылар. Саьбийлердинъ аьр бир куьни суьйинишке, янъы ашылувларга эм шетсиз суьйимге толып озсын!
Нурият Кожаева.