Быйыл савлай дуныя Уллы Аталык согысында Енъуьвдинъ 80 йыллыгын белгилейди. Элимиз бойынша бу куьнге багысланган шаралар оьткериледи. «Шоьл тавысы» республикалык газетасы эм Дагестан Республикасынынъ Язувшылар союзынынъ ногай секциясы редакция меканында «Согыс акында ятлавлар окыймыз» деп, шаирлик конкурс озгардылар.
Шарады ногай язувшылар секциясынынъ етекшиси Гульфира Бекмуратова ашты эм юритти.
– Сыйлы конаклар эм конкурсантлар!
Тарихте бар сондай куьнлер, олардынъ уллылыгы заман ман таймайды, кайтара, маьнеси уьйкен бола береди. Аьр йыл сайын, язлыклы куралда, биз согыстынъ канлы эм кыйынлы йылларына караймыз, оьз яшавларын курманлык эткен аьскершилердинъ алдында бас иемиз эм тири ветеранларга сый этемиз. Оькинишке, йыл сайын олар азаядылар. Биз буьгуьн яттан ятлавлар окувшылардынъ конкурсында йыйналдык. Бизим конкурста катнаскан балалар согыс акында ятлавлар айтаяк, – деп айтты ол йыйналганларга.
Ол баьрисин де Енъуьв куьни мен кутлады эм бу йылдынъ язлыгы бизге тагы да бир енъуьвди аькелгенин, яслар уьйге аман-эсен кайтканын йорады.
Жюри сырасында Ногай районынынъ Билимлендируьв управлениесининъ етекшисининъ орынбасары Медина Гапарова, «Шоьл тавысы» газетасынынъ яваплы секретари Любовь Уразаева, боьлик редакторы, шаир Магомет-Али Ханов, Карагас авылынынъ ногай тил окытувшысы Нурия Аджигайтарова катнастылар. Конкурста районнынъ 5-11-нши классынынъ окувшылары ортакшылык эттилер. Балалар Г. Аджигельдиевтинъ, Кадриядынъ, А.Култаевтинъ, А.Киреевтинъ, К.Кумратовадынъ, М-А.Хановтынъ, С. Майлыбаевадынъ, Г.Бекмуратовадынъ эм баска шаирлердинъ ятлавларын окыдылар. Окувшылар конкурска бек ийги этип аьзирленгенлер, бизим атайларымыздынъ йигитлиги акында ятлавлар окылды, ят ерде согыс майданларда калганлар аьскершилер акында балладалар, поэмалар уьзиклер эситилди. Баргылар тапшырув барысында «Шоьл тавысы» республикалык газетасынынъ бас редакторы Эльмира Юнус кызы Кожаеваа шыгып соьйледи.
– Буьгуьн биз редакциямызда талаплы конакларды суьйиниш пен хош аламыз. Мен оьктемлик пен балалардынъ ятлав айтканын тынъладым. Окувшылар Гамзат Аджигельдиевтинъ «Урланган суьюв» деген поэмасыннаан уьзик айтканда, коьзясымды ясырып болмадым. Мен бек суьйинемен, сиз, бизим балаларымыз, бизге енъуьвди аькелгенлер акында мутпайсыз. Сизге аьли де коьп уьстинликлер йорайман, ана тилинъизди мутпанъыз, эгер биз тувган тилимизди мутсак, халкымызды, миллетимизди эм маданиятымызды йоярмыз, – деди ол. Эльмира Юнус кызы Нариман авылынынъ мектебининъ 7-нши классынынъ окувшысына, конкурс катнасувшы Алия Каракаевага Сый грамота эм акшалай баргы тапшырды.
Йыйылганлар алдында ДР ат казанган маданият куллыкшысы Любовь Уразаева шыгып соьйледи. Ол шарадынъ маьнелигин эм уьйкенлигин белгиледи, тоьрешидинъ айтувы ман, балалар тек ятлав окып калмай, тынълавшыларга шаирлер сыдыраларга салган сезимлерди еткердилер.
– Биз буьгуьн бек ийги шарадынъ катнасувшылары болдык. Мен уйгынлавшыларга эм конкурс катнасувшыларына савбол айтаман, – деди ол.
Конкурс сырагыларын жюри председатели Медина Гапарова келтирди. Ол катнасувшыларды эм катнасувшыларга разылыгын билдирди. Тувган тил окытувшыларынынъ кураторы айырым савбол окытувшыларга айтты.
Катнасувшыларды эки куьпке боьлдилер, 5-7-нши класслардынъ арасында биринши орынды Ислам Нургушиев (Орта-Тоьбе авылы) алды, экинши орынды Азима Камашевага (Куьнбатар авылы) бердилер, уьшинши орынды Эмиль Башантавов (Кадрия атындагы) эм Ясмина Акимова (Эдиге авылы) боьлистилер. Уьйкен класслардынъ арасында биринши орынды – Авасхан Менглиязовага (Джанибеков атындагы), экинши орынды – Айганат Байгараевага (Кадрия атындагы) эм Эльмира Садыковага (Куьнбатар авылы) бердилер, уьшинши орынга Азиза Аджигельдиева (Карагас авылы) тийисли болды. Енъуьвшилерге дипломлар эм китаплер тапшырылды. Баьри катнасувшыларга китаплер эм журналлар берилди.
Шарады тамамлай келе, Г.Бекмуратова конкурсты аьзирлевде катнасканларга, окувшыларга эм окытувшыларга савбол айтты, енъуьвшилерге аьли де коьп бийикликлер йорады.
Уллы Енъуьвдинъ мерекесине багысланган шаирлик конкурсы йылы аьлде оьтти. Балалар бир-бириси мен, шаирлер мен соьйледилер, таныстылар. Шарадынъ тамамында баьриси косылып, суьвретке туьстилер. Мундай шаралар балаларды бириктиредилер, олар Енъуьв куьнди белгилевдинъ маьнелигин анълайдылар, уьйкен атайлардынъ эсине сый этедилер.
Бизим хабаршы.
Суьвретте: Ислам Нургушиев.