Дагестанды данъклаган шаир
Быйыл курал айдынъ ишинде савлай дуныя уллы лезгин шаири Сулейман Стальский тувганлы 155 йыллыгын байрамшылаяк.
Расул Гамзатов шаралардынъ биревиде айткан: «Мага Сулейман Стальскийдай болып, савлай дуныяга Дагестанды данъклаган экинши инсанды коьрсетинъизши». Сол заманда залдан биревдинъ сеси шыгады: «Расул Гамзат увылы, сиз Дагестанды данъкламаган болаяксыз?». Сол соравга Расул Гамзатов булай явап берген: «Мен Сулейман Стальский данъклаган Дагестанда тувганман».
Россия лезгин шаири, литературовед эм публицист Фейзудин Нагиев Сулейман Стальскийдинъ акында булай язады: «Соьздинъ уллы усталары оьз халкынынъ яны да, каны да болып, шагы келгенде, миллет япсарларын оьтип, куьнге, авага кусап, савлай дуныядынъ анъ байлыгы боладылар. Сулейман Стальский – Кудай ман яратылган шаир. Ол аьр заманда да бизи мен болаяк, онынъ поэзиясы аьлиги заман ман бирге абытлайды. Дуныяда ямагатшылыктынъ, инсанлардынъ, властьтинъ баьри кемшиликлерди де йок болса да, Сулейманнынъ яшавдынъ акында ятлавлары айтылып тураяк. Язып та, окып та билмеген ярлыдан Сулейман уллы халк шаирининъ дережесине еткен, ол лезгин халкынынъ миллет белгиси болады. Кыйынлы оьксиз йыллары, куьндегилик авыр куллыгы, ашлык онынъ эрклигин бузып болмады, янына ашувды эндирмеди, ол бактысына оьпкелемеди. Ызгы куьнлерине дейим шаир танъ эм юмарт, оьзден эм ашык, таза юрекли болып калды.
Аьр бир шаирдинъ мырады – оьз халкы ман эситилмеге. Сулейман Стальский – дагестан, лезгин шаирлерининъ ишинде энъ де окылатаган эм суьйикли шаир».
1936-ншы йылда Дагестан халк шаири Сулейман Стальский Аталыгы алдында эткен ислери уьшин Оьр Советининъ Президиумынынъ указы ман Ленин ордени мен савгаланган. Сондай бийикликке етискен дагестанлы орденди тапшырув мезгилинде айткан: «Мен ерде коьмилген тот баскан савыт-садакка усаслы, оны шыгарып, тазалап, йылтыратып, оьткирлеткенлер. Мен соьз беремен, ден савлыгымды, куьшимди эм калган куьнлеримди аямай, оьзимди уллы эм наьсипли Аталыгыма куллык этуьвге багысларман».
Сулейман Стальский шынтылай да халк шаири болады.
Гульфира Бекмуратова,
Россия Язувшылар союзынынъ агзасы.
