Уллы Аталык согысында совет халкынынъ Енъуьвининъ 80 йыллыгы алдында Ногай район авылларында район эм авыл администрацияларынынъ, район Ветеранлар советининъ эм билимлендируьв боьлигининъ аьрекети мен аьзирленген аьдетли автомобиль ювырысы болып оьтти.
7-нши май куьнинде Енъуьв байрагын елпилдеткен автоювырыс куьби бас деп Кара-Су сонъ Кумлы авылында болдылар. Кара-Су авыл администрациясынынъ азбарында конакларды авыл аькимбасы Янибек Динакаев, ясуьйкенлер, мектеб окытувшылары эм окувшылар хош коьрип йолыктылар. Мунда озгарылган кишкей митингте Ногай район администрациясынынъ аькимбасынынъ орынбасары Мурат Шадиев, район Ветеранлар советининъ председатели Акманбет Сангишиев, район билимлендируьв боьлигининъ етекшиси Амирхан Межитов, «Союз «Чернобыль» район боьлигининъ председатели Руслан Кунтувганов, авылдынъ алдынгы аькимбасы Оразали Копиев кутлав соьзлерин айттылар.
Муннан сонъ автомашиналар Кумлы авылынынъ янъы мектебининъ азбарында болып оьткен уьйкен байрам шараларында катнастылар. Автоювырыс катнасувшыларын авыл аькимбасы Сакинат Елманбетова, яшавшылар, окувшылар колларында байраклары эм юзлеринде кувнак куьлемсиревлери мен йолыктылар. Сол ок куьн мунда Патшалык ногай халк саз алатлар оркестрининъ артистлери уьйкен байрам концертин бердилер. Баьри авыл яшавшыларын эм келген конакларды келип турган Енъуьв байрамы ман авыл етекшиси Сакинат Елманбетова кутлады. Эстеликли митингте район аькимбасынынъ орынбасары Мурат Шадиев шыгып соьйледи. Ол биз баьримиз де буьгуьнлерде Уллы Енъуьвдинъ 80 йыллыгын карсы алып турганымызды айырым белгиледи. Сонынъ уьшин де автомобиль ювырысы бу уьйкен тарих оьзгерисине багысланган. «Бизим асыл борышымыз – ол бизим аталарымыздынъ эм атайларымыздынъ йигитлигин эсимизде сакламага эм яс несиллерге еткермеге», – деди ол.
Байрам митингинде Ногай район Ветеранлар советининъ председатели Акманбет Сангишиев те шыгып соьйледи эм Уллы Аталык согысында совет халкынынъ Енъуьвине сав районымыз эм сонынъ эсабында Кумлы авыл яшавшылары эткен согыс эм ис уьлисин айтып белгиледи.
Байрам концертинде авыл балалар бавынынъ тербияланувшылары ман мектеб окувшылары оьз оьнерлерин коьрсетип, халктынъ коьнъилин оьстирдилер.
Шарадынъ катнасувшылары ювыктагы эстеликке шешекей байламларын салдылар эм авыр согыс йолларыннан кайтпаганлардынъ эм согыс ветеранлардынъ баьтирлигине бас иедилер.
Шарадынъ ызында кумлышылар келген сыйлы конакларды даьмли ас-сув ман безеклендирилген берекетли столга олтырттылар. Мурат Шадиев район администрациясы атыннан авыл етекшиси Сакинат Елманбетовага сондай йогары оьлшемде аьзирленип оьткерилген байрам уьшин разылык билдирди.
Кумлы авылдан шыгып, автоювырыс куьби Сылув-Тоьбе авылына келдилер. Мунда ямагаттынъ аркасы ман авыл яшавшыларына – Уллы Аталык согысынынъ катнасувшыларынынъ сыйына курылган эстеликти ашув шарасы болып оьтти. Сога багысланган митингти аша келип, авыл етекшиси Янибек Динакаев ямагаттынъ аьрекети эм ясуьйкенлердинъ маслагаты ман Уллы Енъуьвдинъ 80 йыллыгына багысланып Сылув-Тоьбе авылыннан давга кеткенлерге айырым бир эстелик белгисин салмага карар алынганы акында айтты. «Бу эстеликти биз Тувган Элимиздинъ эркинлиги уьшин согыс йылларында ян берген эм соннан кайтып келип, тувган авылында халк хозяйствосын кайтадан курган авыл яшавшыларына багысламага ниет эттик», – деди Я.Динакаев. Ол районнынъ Ветеранлар советининъ председатели А.Сангишиевке, «Союз «Чернобыль» район боьлигининъ председатели Р.Кунтувгановка эки йыл артта авыл байрамында бу эстеликти курмага керек деген ойларын айтканы уьшин разылык билдирди. «Мен сол заман баьринъизге де бу ниетти яшавга шыгармага соьз бердим эм сизинъ коьмегинъиз бен соны толтырдым. Солай ок эстеликти курувга ярдам эткен ясларга эм яшавшыларга разылык билдиремен», – деди Я.Динакаев.
Эстеликли белгиди шатлыклы аьлде ашувга сыйлы ыхтыяр бу авылда тувып оьскен ясуьйкенлер: ис ветеранлары Енали Копиев пен Салимет Аджиевага берилди. (Аьлиги заманларда Е.Копи- ев Кара-Сувда, С.Аджиева Терекли-Мектебте яшайдылар).
Авыл яшавшыларына оьзлерининъ йылы кутлавларын район Ямагат палатасынынъ председатели Эльмурза Саитов, ис аьрекети мен байлы болувына да карамастан, алыс йолды кыскартып келген ФСБ полковниги Алибек Мурзаев, ясуьйкенлер Енали Копиев, Эсенгельди Магомедов айттылар.
Я.Динакаев эстеликти курувда белсен катнаскан эм сога ярдамласкан айырым авыл яшавшыларына грамоталар тапшырды.
М.Ханов.
Суьвретте: ис ветеранлары Енали Копиев пен Салимет Аджиева эстеликти ашадылар.
