Сондай шакырув ман буьгуьнлерде эм аьр заман, аявлы окувшым, мен сага соьзимди каратаман. Тувган тилимиз. Халкымызды йойытпайык деп тилимизди саклав уьстинде баьримиз де куллык этемиз. Сондай ниет пен бизим республикалык «Шоьл тавысы» газетамыз да ислейди. Кашан да, эл арада сыйымыз йок деп айтсак, янъылыс болар. Тек йылда эки кере (сол язылув кампания озгарылув шагы) биз, редакция куллыкшылары, оьзимиздинъ акымызда коьп затлар билип каламыз. Сол да ясыртын тувыл. Болады, орамда токтатып та, «кой сиз тиленши болып токтадынъыз, соьйтип аьдем газетага яздырмас» деп те айтадылар. Дурыс, языладылар, бар дайымлык инсанларымыз, ким газетага бир тел согув ман языладылар. Сонда да «язылынъызшы» деп тилемеймиз, «язылувдынъ заманы келди» деп эслерине саламыз.
Бар ногайымда йигерли йигитлер. Сога аьлиги кыйынлы заманларда баьримиз де шайыт боламыз. Йигитлеримиздинъ баскалары да бар, «мен ногай, мен Эдигединъ немереси!» деп коькирегине урып, баалы коьликлерди айдап, акшады шашып юргенлерди де коьремиз. Тек газетамызга язылув кампаниясы басланганда, редакция куллыкшысы тел сокса яде барса, 350 маьнетти кисесиннен шыгарып берип болмайды. Сол заманда ойлайсынъ, кайда сенинъ коькирегинди какканынъ, Эдигединъ немереси?
Маьселе ме экен? деген рубрика ман язувымнынъ да маьнеси йок тувыл. Сол маьселе экенин оьзим анълайман, неге десе аьр бир аьдемнинъ ойы, ниети тувган тилимизге каратылмаса, сынъар газетамызга сый этпесек, ога язылмасак, халкымызды да йойытпага боламыз. Тек баскалар оьзине сол соравды берип болама – маьселе ме экен?
«Шоьл тавысы» газетамыздынъ бетлеринде баьри актуальли соравлар коьтериледи, СВО еринде оьз куьшлерин, яшавларын аямай, Аталыкты саклап турган коршалавшыларымыздынъ акында язамыз, савлай элимизде, республикамызда болатаган оьзгерислерди ашык кепте коьрсетемиз. Туьрли регионларда яшайтаган ердеслеримиз акында айырым бети шыгады.
Эндиги йыл «Шоьл тавысы» оьзининъ 95 йыллык мерекесин белгилеек. Газетамыздынъ тарихи бай, мунда кайдай талаплы, акыллы инсанлар ислегенлер. Олардынъ аьр бирисининъ акында айырым язса, кызыклы йылязба болаяк. Буьгуьнлерде де зейинли журналистлер халкымыздынъ тарихи, белгили инсанлары акында ийги этип язадылар.
Газетамыздынъ тагы да бир язылув кампаниясы тамамланып туры. Тувган тилимизде шыгатаган баспа органы тийисли дережеде ислесин деп баьри амалларды да алармыз, сога биз, журналистлер, шекленмеймиз. Аллага шуькир, дайымлык пан газетамызды окыйтаганлар бар. Сол да бизге суьйиниш эм куьез. Тек баьриси де сынъар газетамызга сый этип, халкымызды эм бай, шебер ногай тилимизди саклавга оьз уьлисин косканын суьемиз.
Г.Бек муратова,
Россия Язувшылар союзынынъ агзасы.