Тарумов районынынъ 80 йыллык мерекеси шатлыклы аьлде байрамшыланды. Бас майданда оьрметли мерекеди бирше белгилемеге эм тарумовшыларды бу маьнели оьзгерис пен кутламага районнынъ коьплеген авылларынынъ яшавшылары, власть органларынынъ ваькиллери, сыйлы конаклар йыйылган эдилер. Байрамнынъ шатлыклы кесегинде, Тарумов районынынъ авыл хозяйство эм баска тармаклары бойынша бийик уьстинликлер коьрсеткен алдышы аьрекетшилери йогары патшалык савгаларына, сыйлы баргыларга тийисли этилдилер. Байрамда авыл-хозяйстволык туьрли азыктуьликлери салынган выставкасы да маьнели орынды тутты. Выставка майданында эт, балык, суьт, ясылша, емис эм сондай баска азык-туьликлери салынган эди. Солай болып, байрам программасын волейбол, футбол, шашка спорт ойынлары бойынша базласувлары да ярасыкладылар. Кызыклы ойынлар юруьв майданы туьрли яслы эм миллетли ойнавшыларын бир ерге йыйды. Тарумов районынынъ сыйлы мерекесине багысланып ат шабыс базласувлары да оздылар. Атлар уьстинде кызыклы базласувлары районнынъ ат спорты ман кызыксынганларды, авыллар яшавшыларын, байрамга деп келген конакларды да йыйды. Ат шабыста Тарумов, Ногай районларыннан, баска болып, Кизляр, Хасавюрт калалардан эм баска авыллардан ат спортын суьювшилери ортакшыладылар. Сол спорт кеби ярысынынъ катнасувшылары ат уьстинде усталыкларын, аттынъ уьстинде оьзлерин оьнерли тутып болувларын эм йоргалап айдавларын коьрсеттилер, каравшылар болса ат шабыстынъ барысын юреклери телезип, коьтеринки коьнъилде карадылар. Солай болып, Тарумов районнынъ 80 йыллык сыйлы мерекесине багысланган шатлыклы шара уьйкен байрам концерти эм туьрли-туьсли салюты ман тамамланды. 

Г.Нурдинова. Суьвретте: шарадан коьринис