Быйылдынъ 8-нши сентябринде Россия халклар тиллерининъ куьнин белгилемеге планлайдылар. Бу карар РФ Президентининъ «Патшалык тил политикасынынъ
негизи» Указында (№474, 11.07.2025й.) токтастырылган. Онынъ сол куьнде белгиленуьви босына тувыл, ол совет шаири, прозаик, публицист, ямагат эм политикалык аьрекетшиси, коьшируьвши Расул Гамзатовтынъ тувган куьни мен рас келеди.

Бу баслав элимиз халкларынынъ тиллерин саклавга, колтыклавга эм оьрленуьвге, халклар ара бирликти беркитуьвге эм патшалыгымыздынъ маданият асабалыгын сыйлавга каратылган. Россияда аьлиги заманга 270-тен артык тиллер эм диалектлер саналады. Мектеблерде, балалар бавларында, косымша билимлендируьв учреждениелерде балалар элимиздинъ аз санлы халклар тиллерин уьйренмеге боладылар.
Бу байрам куьнин токтастырув ман байланыслы маслагаты ман биринши болып РФ Президенти Владимир Путин боьлискен. Онынъ акында соравды ол 2025-нши йылдынъ 5-нши июнинде орыс тилин эм Россия халкларынынъ тиллерин колтыклав тармагында патшалык политикасынынъ яшавга шыгарув бойынша Советининъ кенъесинде коьтерген. «Президенттинъ баьри карарларын биз яклаймыз, а бу йолай биз ога айырым маьне бердик, Гамзатов дагестанлы болганга тувыл, Гамзатов
– дуныя поэзиясынынъ, дуныя адабиятынынъ классиги экенин биз баьримиз де анълаймыз…
Эм ким, миллет шаириндей болып, бизим коьпмиллетли Россия халкларынынъ тиллерин белгилемеге болады. Эм сондай шаир, соьзсиз де, Расул Гамзатов экени аян», – деди республика
етекшиси Сергей Меликов. Онынъ айтувы ман, Россия халклар тиллерининъ куьни 8-нши сентябрьде белгиленмеге планланып, эндигиден армаган эстеликли куьн эсабында байрамшыланаяк. Россиядынъ тамырлы халклар тиллерин яклав бойынша шаралар белгилеп, оларды яшавга шыгарув тапшырмаларды толтырув бас орында турмага керек болады.
Л.Ибрагимова.