Коькек айынынъ ызгы куьнлери баьримизге де суьйинишли эм маьнели болды, бу айдынъ 26-ншы куьнинде ВСУ аьскерлериннен Курск области босатылган. Россия Президенти Владимир Путин яв ман йигитлерше куьрескен РФ Савытлы Куьшлерининъ боьликлерине оьз разылыгын билдирди.
2025-нши йылдынъ навруз айынынъ 12-нши куьнинде РФ ВС Генштабынынъ етекшиси Валерий Герасимов бизим 600-ден артык аьскершилер газ трубадан явдынъ 12-15 шакырым ерине дейим барганы акында билдируьв этти. Бу операция бойынша «Ветеранлар» бригадасынынъ аьскершилери, спецназ «Ахмат», 11-нши десант-штурмовой бригада, 30-ншы мотострелковый полк катнастылар. Герасимовтынъ айтувы ман, штурмовой подразделениесининъ йигитлерше коьрсеткен аьрекети явга анъсыздан эди, онынъ коршаланувын бузып, аьскершилер Курск областинде Россия Савытлы Куьшлерининъ алдыга барувын аьжетсизледилер. Сол йигерли яслардынъ ишинде бизим ердесимиз, Червленные Буруны авылынынъ яшавшысы Хаджимурад Аличиев болганы – баьримизге де оьктемлик.
Хаджимурад СВО ерине Сургут каласыннан 2024-нши йылдынъ караша айынынъ 11-нши куьнинде кеткен. Яс Червленные Буруны авылында оьскен, окувды битирип, сырт якка ислемеге кеткен. Анасы Алавхан Боранали кызы Хаджимурадты, онынъ аьптеси Аминатты ялгыз оьзи оьстирген. Кыйын эди, болса да хатын белин бувып, баьри оравлыкларды да енъип болды.
Согыс спецоперациясы басланганда ок, Хаджимурад анълайтаган эди – Аталыкты сакламага атланув керекли. Оьз тенълериндей болып, явды урмага йолланды яс. СВО ерине кеткенин бирев де, анасы да, билмейтаган эди, Алавхан Боранали кызы тек карагыс айында билди. Хаджимурад (Позывной «Мага») Аталыгына куллык этеди, онынъ айтувы ман, сол – аьр бир эр кисидинъ киели борышы.
Трубадан оьтпеге керек деген борыш алдыларына салынганда, яслардынъ биреви де ойланмады. Планды «Ветеранлар» бригадасынынъ аьскершилери ойлаганлар, бу бригадада куллык этеди Хаджимурад. Бизим коршалавшылар йигитлерше сол борышты толтырдылар. Кайдай кыйынлы эди сол трубадан оьтпеге, тек бизим яслар баьтирлик коьрсеттилер. Биз олар ман оьктемсиймиз.
Хаджимурад Аличиев туьрли миллетли аьелде тувган, онынъ атайы Ахмед Иса увылы Магомедов Уллы Аталык согысы заманда Курск областин коршалаган. Буьгуьнлерде онынъ уныгы Хаджимурад та, атайындай болып, бу ерди явдан босаткан.
Ахмед Иса увылы Цумада районынынъ Гадари авылында тувган, ерли мектебти битирген. 1939-ншы йылда армияга эр борышын толтырмага шакыртылган, мунда кавгады карсы алды. Тынышлы заманларда согыстан сонъ Хасавюрт районынынъ Теречное авылында куллык эткен. Буьгуьнлерде уьйкен атайы оьзининъ уныгы ман оьктемсиген болар эди.
Хаджимурад Аличиев – бизим баьтир. Кыйынлы борышты толтырганы уьшин ердесимиз патшалык баргысы – Йигитлик орденине тийисли этилинген. Биз шекленмеймиз, баргы оьз иесин табар.
Анасы Алавхан Боранали кызы, аьптеси Аминат, увылы Руслан ювык эм аьзиз аьдеми мен оьктемсийдилер эм Хаджимурадты аман-эсен уьйде куьтедилер. Бизим элимизге енъуьв керек. Сол енъуьвди Хаджимурад Аличиевтей йигерли ясларымыз аькелер.
Г.Бекмуратова.
Суьвретте: Х.Аличиев.