Россия элимиздинъ аьр кайсы регионларында да туьрли федераллык программалары яшавга шыгарылып, ясларымыз ис орынлары ман канагатланып, суьйген ислери бойынша сулыпларын байытып, оьз билими мен халкына, элине пайдасын тийдирип келедилер. Сондай программалары Ставрополь крайында да етимисли яшавга шыгарылып, коьплеген ясларга оьз кесписи бойынша емисли аьрекетлемеге амал тувдырады. Буьгуьнлерде Ставропольеде «Земский тренер» деген программа «Спорт России» эм «Развитие физической культуры и спорта» деген Россиядынъ патшалык программалары яшавга шыгарылады. Айтпага, ол янъыларда етимисли аьрекетлеп баслаган регионаллык программаларынынъ бириси. Сол программа бойынша Ставрополь крайында 2026-ншы йыл ишинде алты специалистлер, ерли спорт ошаклары ман келисуьвлер туьзип, куллык этип баслаганлар. Программа 50 мынъга ювык яшавшылары болган кишкей калаларын эм авылларын спорт бойынша яс кадрлары ман канагатлавга каратылган. Яс специалистлерге бир кере тоьленетаган бир миллион акша эсабында карыжы авыл ерине барып куллык этуьв ниетте бериледи. Сондай программа катнасувшыларынынъ бириси болды спорт бойынша яс специалисти – Аскер Айдогдиев. Аскер Нурмухамедович Нефтекум районынынъ Махмуд-Мектеб авылында тувган, сонда ерли мектебти окып тамамлаган. Оннан сонъ яс Дагестаннынъ Хасавюрт каласындагы олимпиада резерви бойынша училищесинде билим алган. Бала шактан мырат эткен, юрек шакырувы ман сайлаган кесписин байырлаган ясты балаларга уьйкен суьйими, алган билимин, йыйган бай сулыбын яс аркага коьширмеге деген алал ниети тренерлик аьрекетине аькелди. Буьгуьнлерде Аскердинъ алдында спорт бойынша кызыклы йоллары ашылып, сол программа аркалы ога элине оьз иси мен пайдалы болмага амал берилди. Яс он бир ясыннан алып спорттынъ эркин куьрес кеби мен кызыксынып келди. Буьгуьнлерде ол Нефтекумск округында эркин куьрес эм футбол бойынша яс спортсменлерди етимисли аьзирлейди. Эркин куьрес бойынша Россия спортынынъ мастери, онынъ етисуьвлеринде сыйлы орынды Ставрополь крайынынъ чемпионатларында, савлайроссиялык, республика эм район бойынша турнирлеринде тийисли болган енъуьвлери алады. Биз де тренер Аскер Нурмухамедовичке алдыда спорт тармагында уьстинликлерди, туьрли дережели ярысларында йогары етимислерин коьрсеткен тербияланувшыларды, бийик енъуьвлерди йораймыз! 

Г.Нурдинова. Суьвретте: Аскер Айдогдиев.