Янъыларда бизим сав уьйкен элимиз, намысын эм эсин дурыс саклаган баьри баска эллер де Уллы Аталык согысында совет халкынынъ Енъуьвининъ 80 йыллыгын байрамшыладылар. Халкымыздынъ, бизим атайларымыздынъ эм аталарымыздынъ уллы йигитлиги алдын эм аьли де савдуныялык тарихинде тийисли уьйкен орынды бийлейди. Савлайхалклык байрам алдында «Этномедиахолдинг «Дагестан» ДР ГБУ «Шоьл тавысы» республикалык газетасынынъ редакция коллективи 1945-нши йылдагы халкымыздынъ немец-фашист Германиясын Енъуьв куьнининъ орыны эм маьнеси акында сорастырув юриткен эди. Сорастырылган аьдемлер ишинде солай ок Терекли-Мектеб авылдынъ энъ де эсли эм сыйлы яшавшыларынынъ бириси ис ветераны, тыл куллыкшысы, Баьтир-ана Асият Баетова да бар эди. Тоьменде Енъуьв куьни акында онынъ айткан ойларын баспалаймыз.
– Мен эм меним несилим уьшин Уллы Аталык согысы тек календарь байрамы
тувыл, биз соны оьз басымыздан оьткергенмиз эм колымыздан келген шаклы уьйкенлерге, фронтка коьмек эткенмиз. Бизим элимиз, халкымыз уьшин бу Енъуьв куьни яшавдынъ оьлим уьстинде, яхшылыктынъ – яманлык, дурыслыктынъ намыссызлык уьстинде енъуьви эди. Сол себептен бизим Енъуьвимиздинъ юзи баска баьри енъуьвлерден де яркын, неге десе сол согыста халкымыз тек оьз-оьзин тувыл, ама сав дуныяды фашизмнен аман акалган. Бу куьнлерде мен аьелим мен коьптен бери яшайтаган орамымызга да курылганлы 80 йыл толады. Сол алыстагы 1945-нши йылда орамымызга бизим Уллы Енъуьвимиздинъ бийик аты берилген. Бизим орамымызда дурысы ман да 20-га ювык согыс ветеранлары яшаганлар. Олардан баскалай,
бизим бир неше авылдасларымыз Енъуьв куьнине етпей, согыстынъ авыр йолларында
йигитлерше янларын бергенлер. Соны ман бирге буьгуьнлерде бизим коьп ердеслери-
миз, арасында орамымыздынъ да яс йигитлери Тувган Элимизди, соны ман бирге 1945-
нши йылдагы Енъуьвимизди, дуныяды нацизмнен коршалап, согыс спецоперациясында катнасадылар. Енъуьв байрамы ман байланыста баьри халкымызды бу данъклы 80 йыллык пан кутлайман, аьр кимге де тынышлыкты, эмишликти, ден савлыкты, суьйимликти эм наьсипти йорайман!
Суьвретте: Асият Баетова.
