Россия халклар тиллерининъ куьнин токтастырув акында баславын хош коьрип, яшавга шыгарылганы маьнели оьзгериске айланаягы шек тувдырмайды. Онынъ оьзгерисли маьнелиги сол: байрам Дагестаннынъ халк шаири Расул Гамзатовтынъ тувган куьни – 8-нши сентябрьде белгиленеек.
Мен билип, Расул Гамзатов атындагы Дагестан педуниверситети Россия эм Дагестан халклар тиллерин саклав эм армаган оьрлендируьв мен байланыста йыл сайын коьп туьрли шаралар озгарады. Олар уллы
шаиримиздинъ адабият калымжасын яйылдырувга тускалган.
Элимиздинъ етекшиси Владимир Путиннинъ бу ийги баславы ман Россия халклар тиллерининъ куьни токтастырылаягы уьйкен разылык тувдырады. Онынъ акында Расул Гамзатов оьмири бойынша айтып эм ойлап келген. Энди онынъ мырады яшавга айланады. Мен сога бек оьктеммен. Расул Гамзатов оьз заманында Россия Язувшылар союзынынъ Дагестан боьлигинде кайбир миллетлер бойынша секретарьлер орынларын ашкан эди, эм мен секретарь болып оны ман аьрекет эттим.
Анвар -Бек Култаев,
Дагестаннынъ халк шаири.