Янъыларда Ногай районымыздынъ билимлендируьв тармагында бир янъылык болып оьтти – «Уьйретемен эм уьйренемен» деп аталган биринши фестиваль.
Бек кызыклы эди. Бу куьн мунда болган аьдемлер, шара оьлшемине коьре доьрт саьатке ювык заман оьткен болса да, бир инсан да «калай арыдык» деген соьзди айтпады.
А-Х.Джанибеков атындагы мектебининъ шаралар уйгынланатаган боьлмесинде Ногай районымыздынъ баьри авыл мектеблериннен ваькиллер бар эди.
Шара уйгынлавшысы – Билимлендируьв тармагы: етекшиси Амерхан Зейнадин увылы Межитов, тамада куллыкшылар Альбина Маликова, Кадрия Янполова, Медина Рашидовна окытувшыларга бек пайдалы болаяк шарадынъ болувына куьш салдылар.
Бу куьн мунда Ногай районынынъ бек ийги окытувшылары йыйылган эдилер. Сулыплары барлар, туьрли район, республика, эл кезегинде етимислери болганлар терен ойлары ман боьлистилер, бу кеспиди сайлаган яс ис йолдасларына тек алдыга барувды йорадылар эм сога да даьврендирдилер.
Сол куьн, эртенги 10 саьатте Билимлендируьв тармагынынъ етекшиси Амерхан Зейнадин увылы, юритуьвшилер Альбина Маликова ман Кадрия Янполовадынъ хош келди соьзиннен сонъ, сол оьзгерисли шарадынъ басланувын белгиледи.
Ол конаклар ман аманласып, коьп соьйлемеди, ама салдарлы соьзин айтты:
– Аьр кайсы исте де бирлик болса, куллык оьрге барады.
Бизим исимизде де тап сондай – ясуьйкен мен яс специалисттинъ араларында байланыс болса, билимлендируьв тармагында уьстинликлер де мол болар,
–деди ол.
Педагогикалык исининъ усталары сулыбы ман боьлистилер Бу куьнги шарадынъ энъ де кызыклысы – окытувшылар озгарган мастер-класслар. Солар
да оьз алдыларына бир неше туьрлиге боьлинген эди, олай дегенимиз, «Наставничество» сексиясында Куьнбатар авылынынъ М.Курманалиев атындагы мектебининъ сулыплы окытувшылары: Тамара Серажудиновна Бариева, Сабират Аруновна Байрашева, Альмира Аджиманбетовна Казманбетова, Эльвира Омурзаковна Шабазгереева биргелес ислев савлай ис коллективтинъ сулыбын оьстирмеге болатаганын коьрсеттилер.
Олардынъ ис йолдасы, Ногай районымыздынъ Орта-Тоьбе авылыннан Сапиет Бекмурза кызы Межитова етекшилев сулыбы ман боьлисти, олай дегеним, мектеб етекшиси болып, яс куллыкшысына кеспиге кирисуьвдинъ сырларын шешти, ол сулыплы окытувшы тек етекши тувыл, ол насихатшы да болатаганы ман да боьлисти. Бу куьн оны ман бирге окытувшы кесписине янъы абытын алаятырган окытувшы Ралина Кишинеева мастер-класста ортакшылык этти.
«Профессиональный прорыв» секциясында атлары тек Ногай районымызда тувыл, Эл кезегинде оьткерилген окытувшылык шараларда ийгилик пен айтылган окытувшылар – А-Х. Джанибеков атындагы мектебининъ окытувшысы Гульнара Солтанхан кызы Хозбулатова, Червленные Буруны
авылынынъ З.Акмурзаев атындагы мектебининъ окытувшысы Гульмира Алимсултан кызы Гапарова, Карагас авылынынъ К.Кидирниязов атындагы мектебининъ окытувшысы Адильхан Сагынбек увылы Менласанов «Учитель будущего» кайдай болмага кереги акында оьз соьйлевлери мен каравшыларды сукландырдылар.
Аьр кайсысынынъ да соьзин тынълаган аьдем оьзи де тамамларды келтиргендир деп ойлайман. Мен оьзим бу яс окытувшыларга карап сейирим де калды эм
ой-токтас та эттим – ис сулып тек заман ман келмейди. Аьдемнинъ оьзиннен де, йигерлигиннен де коьп зат себепли болады. Аьр кайсы баславды да йигерли кепте, бир заттан да коркпай басламага керек, сол заман сен алдыга бармага боласынъ, оьзинънинъ алдынъа мыратлар да салып болмага керексинъ…
Алдыга карав: талаплы балалар ман ислев сексияда А-Х. Джанибеков атындагы мектебининъ окытувшысы Заира Эльгайтар кызы Акимова, Кадрия атындагы мектебининъ окытувшылары Фатира Эсенгельди кызы Магомедова, Маржанат Толеген кызы Мавлимбердиева кызыклы хабарладылар. Аьр кайсысынынъ да талаплы окувшылар ман ислевде оьз методикасы бар экен.
Бу окытувшылар оьзлерининъ ис аьрекетлери бойынша коьплеген республикалык шараларда ортакшылык эткенлер, коьп ерлерден уьстинликлер мен кайтканлар, уьстинлик болмаган ерде сулып алганлар. Аьли де ис аьрекет барады. Керек ерде, тергев ислер мектебтинъ межелериннен шыгып этиледи. Бу ерде атааналардынъ да коьмеклери тиеди, окытувшылардынъ соьзлеринде оларга да разылык билдирилди.
Шарадынъ ызы боьтен де кызыклы эди. Бу куьн мунда шайыт болган окытувшылар, боьтен де яслар, озгарылган мастер-класслар оларды хайран эткени мен боьлистилер. Оьзлери де ис аьрекети бойынша бу куьн коьргенин балаларды окытувда кулланаягын айттылар.
Оьзек те, мастер-класслар оьткерген сулыплы окытувшылар Сый грамоталар ман белгилендилер. Ама бу куьннинъ энъ де баалы савгасы – сулып эм
йыйылганлардынъ алган коьнъили. Терекли-Мектебте бу куьн оьткен «Уьйретемен эм уьйренемен» деген фестиваль Ногай районымызда билимлендируьв тармагы оьрленетаганын эм келеектегине йигерли карасы барын тагы да бир ыспатлады. Акыйкатында да, бизде уьйретип болаяклар да, уьйренееклер де бар.
Галима Курганова, Россия Журналистлер союзынынъ агзасы.
Суьвретте: шара барысында.