Уллы Енъуьвдинъ тагы да бир язлыгын хош коьрип алдык. Бек маьнели оьзгериске багысланган коьплеген шаралар озгарылдылар (байрамнан алдын). «Шоьл тавысы» республикалык газетасынынъ ис коллективи де сол куьнге оьз косымын этти – редакция ерлескен меканда бир аьлемет йолыгыс озды.
Бу куьн мунда конакта Уллы Аталык согысынынъ ветераны Уразбай Коьгий увылы Темирбулатовтынъ кызы Софья ман аьлиги заманда озатаган согыс спецоперациясында йигитлерше ян берген аьскерши Арслан Сейпулла увылы Етмишевтинъ тул хатыны Марьямгуль, яс несил ваькили Аниса Сеитова болдылар. Йолыгыс бек кызыклы оьтти. Софья Уразбай кызы атасынынъ оьткен согыс йолын суьвретледи, ол оьзи тири шагында балаларына келбаклап, оьзининъ аьскершилик аьрекети акында айтатаган болган.
Уразбай Коьгий увылы Темирбулатов – согыс йылларда болсын, оннан сонъ да, Элдинъ онъайлыгы уьшин белсенли аьрекет юриткен эр киси. Ол 17 ясындагы яс аьдем болып, оьзининъ оьмезлиги мен ясы етпей аьскер сыраларына турган экен. Авыр эди онынъ сол йолы, кайдай кыйынлыкка да раскан, согыс майданда оьлимнинъ коьзине караган
эр йигит болган ол…
Уллы Аталык согысы. Биткенли де 81 йыл озды. Сол шаклы йыллар биз Уллы Енъуьв куьнин белгилеп келемиз. Бу байрам – эм куванышлы, эм кайгылы…
Оькинишке, аьлиги заманларда да тынышлыкта яшаймыз деп айтып болмаймыз, бизим яшайтаган ерлеримизде тынык болса да, эр йигитлеримизге элге шапкан яв ман куьреске шыкпага керек болады. Не шаклы ясларымыз согыс спецоперациясында катнасадылар, дав майданда йигитлерше ян бергенлер юрек кайгысын арттырады. Аьли биз олардынъ атларын оьктемлик пен айтып, эсимизде саклаймыз. Сондай яслардынъ бириси болады буьгуьн бизде конакта болган Марьямгульдинъ эри Арслан Етмишев те.
Марьямгуль бизге оьзининъ эрининъ йигитлиги акында хабарлады эм аьр бир йолыгыс катнасувшысына оьзининъ ийги йоравларын айтты.
Баьримиз де кишкей Анисадынъ согыс акында яттан айткан ятлавын сукланып тынъладык. Баладынъ соьзинде – танълагы куьнге ийги сенимлер, алдыдагы ярык яшавга уьмитлер…
Бу йолыгысты газетамыздынъ бас редакторы Эльмира Юнус кызы Кожаева хош келди соьзи мен ашты. Ол бу куьнги конакларга каратылган йылы йоравларын айтып, бу куьнгидей йолыгысларды озгарув бизге ийги аьдет болатаганын да белгиледи.
Элбетте, бу йолыгыс та бизим эсимизде сакланаяк. Софья Уразбай кызынынъ хабары бек кызыклы эди. Аьлиги заманда сол узактагы согыс акында сонда катнасканлардынъ увыллары ман кызларыннан артык бирев де хабарлап болмаяк, олар биринши авыздан эситкенлердинъ сонъгы несили боладылар. Буьгуьн олар – эс, тарихтинъ тири булаклары…
Йолыгыс, янга якын болып, ийги эм йылы аьллесуьв аьлинде оьтти. Мага кызыклы эди.
Г.Курганова.
Суьвретте: йолыгыстан сонъ.