1945-нши йылдынъ коькек айынынъ 24-нши куьни, согыстынъ 1403-нши куьни барады. Сол куьн биринши Белорусс фронты Берлиннинъ кубылакуьнбатар ягында биринши Украин фронтынынъ онъ флангынынъ алдышылыктагы боьлик аьскершилери мен йолыгысады. Олар франкфуртско-губенский яв куьплерин курсавга аладылар. Сол ок куьн Жуковтынъ аьскершилери немецлердинъ
бас каласы Берлиннинъ сырт эм куьнтувар якларындагы орамларында согыс бардырганлар. Олар ызлы-ызыннан каладынъ туьрли районларын, кварталларын явдан босатканлар. Силезский вокзалы да совет аьскерининъ колында эди. Берлиннинъ орталыгында болган согысларда баьри аьскер
боьликлери де урыслардынъ авырлыгын сезди. Мундагы урыслар бек каты эм кавыфлы эди.
Берлинди алувда катнаскан аьр бир штурмовой куьптинъ агзаларынынъ борышлары эртеректен белгиленген эди. Аьр бир орамды, уьйди алувдынъ оьз йорыгы бар эди. Яв бек куьшли эристи, ол
да оьз ягыннан энъ де куватлы аьскер боьликлерин куьреске салды, тез аьрекетте «фольксштурм» куьби де туьзилди. Берлиннинъ кубыла ягында биринши Украин фронты Тельтканалын беркитуьв уьстинде иследи.
Бесинши урувшы армия Берлин орамларында каты согысларды бардырып, орталыкка йигерли абыт алып барды. Александерплац майданы алдыда эди. Сол армия етекшиси Совет Союзынынъ Баьтири генералполковник Берзарин эди, онынъ ис сулыбы айлак уьйкен эм етимисли болган, соны билген етекшилер оны Берлинде совет гарнизонынынъ етекшиси эм биринши совет коменданты этип беркиттилер. Апрель айынынъ 24-нши куьни Германияда гитлердинъ буйырыгын толтырып, генерал
Венк биринши Украин фронтынынъ сол флангына куьнбатар бетиннен карсы шыккан.
Гитлерши аьскершилери ягыннан йойымлар уьйкен эди, ама Берлинди Совет Союзына бермей калдырып болмадылар. Гитлер оьзининъ патшалык канцеляриясында олтырып, аьр бир абыт акында билдирип турмага буйырык берип турды. Шпрее йылгадынъ сол ягасында турган Совет Союзынынъ
Баьтири рота командири майор Оберемченко урыслар каты болганда, оьзи етекшилеген аьскер
куьбин контратакага аькетти. Сол урыслар ога сонъгы да болды, ол мунда йигитлерше ян берген.
Бу куьн Италия етинде американшы-английс аьскери По йылгасында урысларды куьшейтип, Ферраро эм Специя калаларын алган. Согыстынъ 1403-нши куьни, Уллы Енъуьвге 15 куьн калып туры, Берлинге Савлайсоюзлык радио бригадасы келген. Олар пленкага Берлин еринде юрип турган урыслар акында репортажлар яздылар эм сол билдируьвлер Москва каласына еткерилип турды.
Аьзирлеген
Г.Сагиндикова.