Савлай дуныяга белгили шаири Расул Гамзатовтынъ 100 йыллык мерекесине багысланган байрам шаралары кырк кийик, казан айларында Минскте (Белоруссия), Баку (Азербайджан), Ташкент (Узбекистанда), эм Бишкек (Киргизия) калаларында озгарылаяклар. Бу патшалыкларында «Расул Гамзатовтынъ булаклары» деген анъ-театраллык коьрсетуьви эм «Бизим Расул» мультимедиялык выставкасы оьткерилееклер. Дагестан Оькиметининъ вице-премьери Муслим Телякавовтынъ белгилевине коьре, шара программасында коьрсетуьвлер озгарылаяк эллерининъ артистлери ортакшылык этееклер.
«Расул Гамзатовтынъ булаклары» деген проекти Маданият баславлары бойынша президентлик фонды ман колтыкланып келеди. Театраллык коьрсетуьвинде Дагестаннынъ энъ ийги яратувшылык куьши, баска болып, Россиядынъ белгили артистлери ортакшылык этееклер. Олар шаирдинъ яшавынынъ туьрли кезеклерин, онынъ аьдемшилигининъ кенълигин, шаирлик оьнершилигин коьрсетееклер. Баска болып, онынъ аталыгымыздынъ адабиатындагы уьлиси акында белгилеп озаяклар. Олардынъ бас борышы белгили шаирди эм кыралымызды язувшымыздынъ уллы шаирлик асабалыгы аркалы коьрсетуьв болады.
Баска болып, Расул Гамзатовтынъ 100 йыллык мерекесин белгилев бойынша шет эллеринде де йогарыда айтылган эллерининъ маданият ямагаты ман йолыгыслар оьтееклер. Солай болып, официаллык делегациясы ман сол ок патшалыкларынынъ маьнели эстеликлерине де барылаяк.
Айтып озайык, Расул Гамзатовтынъ 100 йыллык мерекесине багысланган шаралар Германия, Непал, Кубыла Осетия, Иран, Монголия эллеринде де уйгынланып озгарылганлар.