2025-нши йылдынъ курал айынынъ 2-4-нши куьнлеринде Красноярск каласында эркин куьрес бойынша оьспирлер ара Россия Бириншилиги оьтти.
Сол шарада Дагестан Республикасыннан катнаскан оьспир куьби бек ийги тамамларга етисип кайтты – бизим спортсменлер он медаль казандылар.
Сондай уьстинликлерге етискен оьспирлер арасында ердесимиз Казманбет Батыров та бар. Ол оьзининъ шеккиси бойынша (52 кг) куьшти эм усталыкты коьрсетти.
Казманбет Батыров – Ногай районымыздынъ Нариман авылынынъ яс яшавшысы. Ол бу куьнлерге дейим де коьплеген спорт базласларында катнасып, савгалы орынларга етисип келди. А аьлиги уьстинлиги, онынъ йогары дережели енъуьви бизди суьйинтпей болмады.
Ол катнаскан шарада оьзининъ бес куьндесин енъди, сол санда оны ман бир куьпте болган Халид Абасов та бар.
Белгилеп озайык, Казманбет кишкейлейин спорт пан аьвлигеди, аьлиги заманда онынъ он йылга ювык сулыбы бар. Оны ман арымай-талмай тренер Азамат Кокоев ис аьрекет бардырады эм ястынъ усталыгын коьтеруьвге коьп куьшин салады.
Онынъ Ногай районымыз бойынша спортты коьтеруьвде уьлиси уьйкен. А.Кокоевтинъ тербиялайтаган яслары коьп ерлерде ийги тамамлар коьрсетедилер. Казманбет Батыров, спорт мастерининъ кандидаты – онынъ тербияланувшыларынынъ бириси.
Казманбет Замир увылы Батыровтынъ алдында сынавлар аз тувыл. Ол тезден Италия элининъ Каорле каласында оьтеек Европа Бириншилигинде катнасаяк.
Россия Бириншилигинде катнаскан Дагестан Республикасынынъ оьспир куьби бу куьн, Алания, Шешен Республикаларыннан барган куьплерди калдырып, биринши орынга тийисли болып кайтты.
Сол зат дагестанлы куьптинъ йогары спорт аьзирлигин коьрсетеди.
Бу куьн дагестанлы куьптинъ сырасында болган спортсменлер тек алтын медальлерге тийисли болып калмадылар, ез медальлерге тийисли болганлар да болдылар.
Спорт мастерине кандидат Казманбет Батыровты тувып-оьскен авылы йылы йолыкты: тенълери, кардаш-тувганлары, окытувшылары, ямагат организацияларынынъ ваькиллери…
Онынъ базласлардан сонъ авылына кайтувы уьйкен байрамга айланды. Нариман авыл яшавшылары ерли маданият уьйинде йыйылып, яс чемпионнынъ келуьвин сагынышлы карадылар, карс кагувлар, кутлавлар – бу куьн баьриси де Казманбетке каратылган эди. Тувган-оьскен авылы атыннан ога алдыда енъуьвлер коьп болсын деп мырат этип, ат савгаладылар.
Казманбет Батыровтынъ Россия Бириншилигинде етискен уьстинлиги яс аьдемлерге спорт уллы мырсатлар беретаганын коьрсетеди. Арымай-талмай ислеген аьдем коьп затларга етиседи. Бу куьн Казманбеттинъ кыйыны акланды. Биз алдыда ога тек ийгиликлер, енъуьвлер эм Европа Бириншилигиннен де чемпион болып кайтканды куьтемиз. Тек алдыга, Казманбет.
Г.Сагиндикова,
РФ Журналистлер союзынынъ агзасы.
Суьвретте: Казманбет Батыров енъуьв пьедесталында.