Элимиздинъ бас каласы Москвада «Киши калалардынъ эм тарих поселениелердинъ оьрленуьви» XI форумы барысында оьткен онъайлы кала аьллерин туьзуьвдинъ энъ ийги проектлерининъ Савлайроссиялык конкурсынынъ енъуьвшилерин савгалав ман байланыслы шатлыклы шарасы болып тамамланды. Бабаюрт районына бу кешлик шынтылай да уьстинликли эди: Бабаюрт авылында орталык паркын онъайтлав ман байланыслы «Традиция Отчего дома» проекти, савлай элимиз бойынша ийгилер санына кирип, енъуьвши орынды бийледи. Кенъеслер залынынъ экранында районнынъ аты коьрингенде, Бабаюрт администрациясында карс кактылар. Тувра эфирде шатлыклы шарады карав уьшин мониторинглер касында йыйналган ерли власть куллыкшылары муниципалитет уьшин тарих оьзгерисининъ шайытлары болдылар. Конкурс комиссиясы аьел баалыкларды эм несиллер байланысын белгилейтаган парк концепциясын, солай ок ортага салынып ямагат пан ойласылган баьри маслагатларды эсапка алув ман йогары баалады. Бас савга – 80 миллион маьнет акша оьлшеминде федераллык грант эндиги йылга парк ерининъ ярастырылувына деп шыгарылаяк. Бу амаллар авылдынъ ял алув орталык ери – паркты толысынша ийгилендирмеге амал береек: паркка киретаган ерлери янъыртылаяк, конакшылык аллеясы туьзилеек, балалар, яслар эм ясуьйкен несил аьдемлери уьшин майданлар ярастырылаяк, солай ок аьлиги заманга келисли коммерциялык объектлер ерлестирилеек. Паркты уьлгили ямагат ерине айландырув уьшин ерли предпринимательлер бюджетти байыр амаллар ман толыстырмага аьзир экенлери айырым белгиленеди. Савгады конкурс уйгынлавшылар колларыннан сол шатлыклы шарада ортакшылаган Бабаюрт районынынъ аькимбасы Шахмурат Истанбулов алды. Енъуьв акында оьз ойы ман боьлисип, ол бу уьстинлик администрациядынъ савлай командасынынъ, яшавшылардынъ белсенли позициясы эм бизнес ягыннан анълавлык бары ман юритилетаган ортак исининъ тамамы экенин белгиледи. «Бу вакытка дейим биз узак юрдик, – деп белгиледи Шахмурат Истанбулов. – «Традиция Отчего дома» проекти кабинетлерде тувыл, а оьз авылын онъайтлы, ярасык эм аьлиги заманга келисли этип коьрмеге суьйген яшавшылардынъ ак ниетлигиннен тувган. Федераллык орталыгынынъ колтыклавы эм киши калалардынъ оьрленуьвине байыр эс каратув аркасы ман биз бизим аьеллердинъ яшав сапатлыгын туьрлентуьв уьшин шынты алатын аламыз. Парк баьри несиллерди кызындырган ер, уьйкен болмаган авылларда да дуныялык дережели ерлер туьзбеге анъсатлык барлыгынынъ белгиси болар. Проект бизим еримиздинъ бирлигин беркитуьвинде, онынъ баскага усамаслы аьлеметлигин саклавда эм районымыздынъ оьрленуьвине янъы куьшкуватлык береегине шекленмеймен». Район етекшиси проект уьстинде куллык эткенлердинъ баьрисине де оьз разылыгын билдирди эм, келеген йылда Бабаюрт яшавшылары тек районнынъ тувыл, савлай республикадынъ оьктемлиги болаяк янъыртылган парк бойынша кыдыргандай эп туьзуьв аьллер мен байланыслы шешилмеге керек соравлар каралганнан сонъ, проект яшавга шыгарылып басланаягын билдирди.