Янъыларда Дагестан Республикасынынъ Халк Йыйынынынъ кезексиз сессиясында республика депутатлары Дагестан Оькиметининъ Председателининъ ис орынына Магомед
Рамазановты беркиттилер.
Онынъ кандидатурасын тек янъыларда Россия Президенти Владимир Путин оьзининъ Указы ман Дагестан Аькимбасынынъ куллыгын кесек заманга толтырувшы этип беркиткен Федор Щукин коьрсеткен эди. Регионнынъ ямагатполитикалык яшавында болып озаяткан бу ислер, элбетте, элимиздинъ оьр етекшилери мен эртеректе ойланган эм сол
себептен бизим коьпмиллетли республикамыздынъ яшавшылары Дагестаннынъ янъы етекшилери социал-экономикалык оьрленуьвге алынган йолды армаган бардырар деп сенедилер.
Буьгуьнлерде аналитиклер Федор Щукин документлерди ревизия этуьв, бюрократ куллыгы, солай ок ис орынлардынъ эм меканлардынъ законлыгын тергев мен каьр шегер
деген ойын айтадылар. Магомед Рамазанов коьп ягыннан ердеги яшавшылар эм депутат корпусы ман куллык этер деп сенедилер. Дагестан премьерминистри болып сайланган
куьн ок та ол оьзининъ энъ биринши борышы деп сув коьтерилуьвден кыйынлык коьрген аьдемлерге коьмек этуьв экенин анълатты. Онынъ соьзи буьгуьн-танъла федераллык
орталыгыннан келеек ярдам ман беркитиледи.
Аьли уьшин республикадынъ янъы етекшилерин мактап олтырмага эрте деп ойлайман. Ал деп оьзлерин ислеп коьрсетсинлер яде халк айтканлай: «яшасак – коьрермиз».
Тек Дагестаннынъ янъы беркитилген басшыларына ден савлыкты, республика эм сонынъ яшавшылары уьшин аьр куьнлик ис аьрекетинде уьйкен уьстинликлерди ак юректен
йораймыз! Меним ойыма коьре, регионнынъ Аькимбасынынъ эм Оькиметининъ бирлесип куллык этуьвининъ бас йолларынынъ бириси – ол власть пен ямагат арасында юритилмеге тийисли тувра хабарласув.
Сол зат регионнынъ оьрленуьвине каратылган борышларды шешуьвге эм онынъ коьпмиллетли халкынынъ яшав оьлшемин коьтеруьвге бас себеп болады.
М-А.Ханов.