Туьрли туьсли шарлар, бу куьн согылган сонъгы занънынъ суьйинишли эм аз-маз коьнъилди туьсирген сеси таза коькке ушады, окувшы деп ызгы куьн айтылып турган яс аьдемлердинъ мыратларын алдыга алып барады.
А-Х. Джанибеков атындагы мектебтинъ окувшыларында бу куьн бир аьлемет болып оьтти. Олар оьзлери 11 йыл узагында окыган мектебтинъ тувыл, Ногай районымыздынъ яй маданият уьйининъ каралдысына йыйылганлар, тоьгерек як бек ярасык, сахна ийги аьлде арайысланган, келген конаклардынъ да, окытувшылардынъ да коьнъиллеринде нур ойнайды, колларында туьрли-туьрли, аьр бириси оьз алдына ярасык гуьл байламлар, баьримиз де 2025-нши йылдынъ Выпускнигин кутлаймыз. Байрам шарады оныншы класс окувшылары Л.Нургишиева ман А.Хозбулатова эм мектеб етекшисининъ маслагатшысы Ф.Джумакова юриттилер. Байрам линейкасынынъ барысында бу куьнги выпускниклерди Ногай район аькимбасынынъ орынбасары Рашид Шангереев, мектеб етекшиси Курасхан Ярикбаева, ата-аналар атыннан Расул Сагнаев, выпускниклер атыннан Авасхан Менглиязова кутладылар эм саламласув соьзлерин айттылар.
Солай ок бу куьн окув йыл ишинде туьрли шараларда катнасып, савгалы орынларга тийисли болган окытувшылар да, окувшылар да грамоталар ман белгиленди.
Бу куьн уьйкен эс 2025-нши йылдынъ выпускнигине этилди. Аьр бир выпускник белгиленди. Ызгы занъды согув ыхтыяр мектебти тек ийги белгилерге окып битиретаган выпускниклерге: Амина Кургановага, Зульфия Кадыровага, Алишер Юмартовка, Алина Лукмановага, Айнагуль Ваисовага, Авасхан Менглиязовага берилди.
Ызгы занъ согылды, алдыда Ортак Патшалык сынавлар. Аьр бир выпукникке тек ийги белгилерди, йогары етимислерди йорайман. Ашык болсын аьр бир баладынъ йолы…
Г.Сагиндикова.
Суьвретте: А-Х.Джанибеков атындагы мектебининъ 2025-нши йылдынъ выпускниклери.