Йыл сайын казан айынынъ экинши киши юмасында 2000- нши йылдан алып Савдуныялык коьзлердинъ савлыгын саклав куьни белгиленеди. Бу куьн Савдуныялык савлык саклав организациясынынъ баславы ман аьдемлерге коьзлерининъ савлыгына эс эттирер ниетте беркитилген. Савдуныялык савлык
саклав организациясынынъ статистикасына коьре, дуныяда 253 миллионга ювык аьдемнинъ коьзлери осал коьреди, а олардынъ сырасындагы 36 миллион аьдем бир зат та коьрмейди. Врачлардынъ ойына коьре, мундай аьдемлердинъ 80 процентин эмлемеге болаяк. Коьзлердинъ савлыгын саклар уьшин врачлар мунавдай маслагатлар береди.
Зарарлы касиетлерди коймага, энъ де бас деп таьмеки тартувды. Таьмекидеги никотин кан тамырларын тартады. А дайым да «глазное яблокодынъ» капиллярынынъ куллык этуьвининъ йорыгы бузылып турса, коьзлердинъ савлыгына зарар келеди.
Кан коьтерилуьвди де тергеп турмага тийисли, кан коьтерилуьв глаукомага келтирмеге болады. Коьздинъ сетчаткасын беркитетаган черника ман морковь ашамага, солай ок лютеин, антиоксидантлы витаминлер эм минераллар кулланмага керек. Лютеин коьзлерди ульрафиолеттинъ етуьвиннен эм сетчаткады бузылувдан
саклайды. Ол аьдемнинъ шаркына тек азыклар ман бармага болады. 12 мг лютеин (бир куьн ишинде шаркка туьспеге тийисли кадер) уьшин аьдем бир неше килограмм морковь эм хурма ашамага керек. Аьдем сол шаклы ашап болмайды.
Сонынъ уьшин витаминлер кулланмага керек. Тагы да куьннинъ коьзи куьшли яркыраган куьн кара сисели коьзилдирик таксанъыз яхшы болар. Офислерде компьютер алдында ислеген заман аьр 15 такыйка ишинде коьзди тыншайтпага керек. Тез-тез врачка барып коьзлердинъ савлыгын тергетпеге тийисли, кырк яс толганша – йылда бир кере, кырк ястан сонъ – йылда эки кере бармага.
Н.Кожаева.