Аьр бир хатын энъ де ийги эскеруьвлеринде, дуныяга аьвлети энип, янъы ана болганда, оны бийлеген, бир зат пан да тенълестирип болмаган таьтли сезимлерин саклай болар. Яшавында сол сезимлер оны неше кере бийлеген болса, сол шаклы да ол – наьсипли. Дуныяга, янъы яшавга, энмеге ярдам эткен аьдемди кайдай сезимлер бийлейди экен? Бир кере тувыл, куьндегилик исинде сондай ийги оьзгеристинъ шайыты болатаган акушерди янъы тувган баласын колына алган хатын ман бирге суьйиниш эм куьез бийлейтаганына шек йок, ама бизге баска ислерди толтыратаган инсанларга, кыскаяклы болсак та, аьдемди наьсипли эткен сезим оьлшеми белгисиз. Мага янъыларда ис борышыма коьре, 32 йыл узагына акушер болып ислейтаган, коьзи алдында коьп бала тувган кыскаяклы ман хабарламага туьсти. Абидат Аджибаевадынъ айтувы ман, неше йыл ислесенъ де, неше кере коьз алдынъда бала дуныя ярыгын коьрсе де, сол сезимнинъ аьлеметлиги йыллар ман азаймайды, аьдемди кайта-кайта наьсип бийлейди. Сенде суьйиниш коьзяслар тыгырадылар, юрегинъ тез-тез урады эм оьзинъди бир авыр борышты толтыргандай сезесинъ, парахатлык эм суьйиниш бийлейди.
Абидат Аджибаева Кизляр каласындагы медицина училищесин окып тамамлап, Терекли-Мектеб авылындагы Ногай орталык больницасынынъ бала табув боьлигине 1991- нши йыл ислемеге келеди. Мине соннан бери кыскаяклы сайлаган исине алаллыгын коьрсетип, аьр бир онынъ коьмеги тийген кыскаяклыда яшавы бойынша разылык саклатып келеди.
Яс кыскаяклы Ногай орталык больницасына ислемеге келген биринши куьнлерде оны врач Гульфира Теминдарова (яткан ери еннетли болсын) хош коьрип алды. Сулыплы врач яс акушеркады коьп затка уьйретти, адаламай-коркпай оьз исин толтырув керегин анълатты. Бу тыныш болмаган эм бек керекли истинъ сырларын ашкан Гульфира Искаковнага Абидат Танманбетовна юрегинде уьйкен разылык саклайды.
Бу куьнлерде болса, Абидат Аджибаева ман бирге бала табув боьлигинде эки врач – Аскер Арсланов пан Гульфира Тангаева, 3 акушеркалар – Насират Дильманбетова, Увылхан Мусаева эм Гульжана Найманова ислейдилер. Коьп йыллардан бери бирге ислеп келген куллыкшылар бир-бири мен бек татым, яхшылыкта эм яманлыкта бирбирине тирев боладылар.
Акушер аьрекетин сайлаган аьдемнинъ коллары алтын, юреги танъ эм терен билими болмага керек деп айтадылар. Абидат Аджибаева акында да биз соьйтип айтпага боламыз, онынъ алтын коллары эм билими, соны ман бирге танъ юреги исинде куьшли коьмекши боладылар. Ол аьр бир кыскаяклыга йылы соьзи мен баьри зат та ийги болаягына сендиреди. Абидаттынъ карасы бир де сувык болмайды, ол аьр дайым да бир кепте, сабыр эм рахатлы соьйлейди. Мага коьре, Абидат Танманбетовна – кыскаяклыларга кыйналган заманларында коьмек этпеге деп яратылган аьдем. Онда акушеркага керекли баьри касиетлерди таппага болады.
– Мен бала заманнан алып оьз яшавымды медицина ман, аьдемлерге ярдам этуьв мен байланыстырмага, ак халатты кийип, аьрекетимди бардырмага мырат этетаган эдим. Кене де меним мырадым толды, оьзек те куллыгымыз авыр, тынышлардан тувыл, кайдай да туьрли аьллер болып калады. Акушер тек баладынъ яшавы уьшин тувыл, онынъ анасынынъ яшавы уьшин де яваплы. Кайдай кыйын болса да, куллыгымды бек суьемен, ол мага суьйиниш, куьш, рахатлык аькеледи, – дейди Абидат Аджибаева оьз куллыгы акында.
Ийги иси уьшин Абидат Аджибаева 2019-ншы йыл Ногай орталык больницасынынъ, 2023-нши йыл Медицина куллыкшысынынъ куьнине Ногай район администрациясынынъ «Энъ де ийги акушерка» Сый грамотасына тийисли болган.
Абидат Танманбетовна куллыгына мукаятлыгы ман ис йолдаслары эм яшавшылар арасында сый-абырай казанган. Сулыплы акушеркадынъ усталыгын оны ман бирге ислегенлер эм ярдамы тийген кыскаяклылар белгилейдилер.
– Бизим коьзимиздинъ алдында коьп бала тувады, олардынъ аналарын баьрисин де эсте саклап болмайсынъ. Бир авылларга бара калсам, яхшылыкларда кыскаяклылар янасып, мине сизинъ кеденъиз яде кызынъыз деп, уьйкен болган балаларын коьрсетедилер. Алдынгы йыллар коьмегим тийген кыскаяклылардынъ бу куьнлерде мага кызлары келедилер, аналарынынъ маслагаты ман. Бу куьнлерде бек оькинемен, меним коьмегим тийген кыскаяклыдынъ эри белгили ногай шаири мага багыслап язган ятлавын сакламаганыма. Коьп йыллар артта сол ятлав «Шоьл тавысы» газетасынынъ бетлеринде шыккан эди, тек оькинишке, мен сол ятлавды кагытка язып алмадым. Бек ийги сыдыралар эди…, – деп боьлиседи Абидат Танманбетовна.
Анасынынъ йолы ман бармага, келеекте врач кесписин байырламага ниет этеди онынъ ялгыз кызы Алина. Кызалак мектебте окувында уьстинликлери уьшин алтын медаль казанган. Мурат пан Абидат Аджибаевлердинъ тагы да эки увылы бар, олар да оьз иси мен пайдалы болмага шалысадылар. Джамал Сургутнефтегазда ислейди. Уьйкени Арсен бу куьнлерде согыс спецоперациясы барысында оьз етекшилевининъ борышларын толтырады. Ога экинши дережели «За воинскую доблесть» медали тапшырылган.
Мундай йылы шырайлы кыскаяклыда сондай куьш эм шыдамлык барлыгына биринши карастан аьдем ынанмаска да болаяк. Биз ога увылын куьтпеге куьш эм шыдамлык йораймыз. Соны ман бирге аьли де коьп йыллар уста акушерка оьз янынынъ кесегин коьзи алдында дуныяга энген балаларга савкатлап келсин.
Н.Кожаева.
Суьвретте: А.Аджибаева.
