Уьстимиздеги 2025-нши йыл Россия маданият фондынынъ регионаллык боьлиги «Россия – меним тарихим» деген тарих паркында С.Батыров атындагы саниятлар мектебининъ художестволык боьлигининъ окувшыларынынъ выставкасын озгарды. Бизим мектебимиздинъ окытувшылары сав йыл белгиленген выставкага аьзирлендилер. Мектебтинъ художестволык боьлигининъ окытувшылары ман окувшылары оны Махачкалада язлык таркавларында озгармага токтадылар. РФ эм ДР ат казанган маданият куллыкшысы, Россия маданият фондынынъ Дагестан боьлигининъ директоры Луиза Гавриловадынъ маслагаты ман, «Меним элим» выставкасынынъ ашылувы 4-нши апрельге, Сраждин Батыров тувган куьнге коьширилди.
Выставка болса курал айынынъ ызына дейим оьтти. Выставкадынъ ашылувына багысланган шара Татами Мурадов атындагы 5-нши номерли балалар саниятлар мектебининъ музыканткумузистлердинъ оьз оьнерлерин коьрсетуьви мен басланды. Олар бу куьн оьз ойнавлары ман байрам аьлин туьздилер. Кумузистлердинъ ногай музыкалык композициясын ойнавыннан балалардынъ коьзлерининъ яйнавы бизге сезилмей болмады. Сонъ «Дагестан» журналынынъ бас редакторы, ДР ат казанган маданият куллыкшысы Марат Гаджиев выставка катнасувшыларын конаклар ман таныстырды. Олар – Дагестан Суьвретшилер союзынынъ председатели Курбанали Магомедов, ДР ат казанган суьвретшиси Апанди Магомедов, РФ Суьвретшилер союзынынъ агзасы, Дагестан суьврет ясав саниятлар музейининъ директоры, шаир Расул Гамзатовтынъ кызы Салихат Гамзатова, выставка залынынъ директоры Амирхан Магомедов, Дагестан
Хатын-кызлар союзынынъ председатели Ихтизар Мамутаева, ДР ат казанган окытувшысы Шагитбек Казбеков, ДР ат казанган суьвретшиси Ажу Качаев, РФ эм ДР ат казанган маданият куллыкшысы Нарбике Муталлапова, Ногай район Хатын-кызлар советининъ председатели Асият Манкаева.
Шара барысында Сраждиннинъ акында суьвретши, ярыкландырувшы эм яркын аьдем эсабында бек коьп ийги соьзлер айтылды. Выставкада ортакшылык
эткен балалар С. Батыровты билген Дагестаннынъ белгили аьдемлерин уьйкен эс этип тынъладылар. Аьр бир аьдемнинъ шыгып соьйлевинде сол шаклы танълык,
коьтергишлев, яс суьвретшилерге ийги йоравлар бар эди. «Меним элим» выставкасынынъ ашылувы С.Батыров атындагы саниятлар мектебининъ окувшыларына эсте сакланган шара болды.
Бу куьн выставка катнасувшыларын савгалав да бек маьнели болды. Салихат Расуловна П.Гамзатова атындагы суьврет ясав саниятлар Дагестан музейининъ фондыннан «Сраждин Батыров. Путь кочевника» деген ярасык этип ясалган буклетлер эм дипломлар тапшырды.
Марат Гаджиев С.Батыров атындагы саниятлар мектебининъ етекшиси Анвар Аджибаевке, окытувшылар А.Акбердиевага, Э.Махмудовага, М.Отевалиевага
эм М.Шалиевага Россия маданият фондынынъ Дагестан филиалы ман баспаланган «Кавказский экспресс.2021» эки топламалы китап савкатлады. Бу янларына баалы савкатларды окытувшылар ман окувшылар аявлап саклаягына, бу куьн оларга айтылган йоравларды мутпаягына шек йок. Сондай йолыгыслар туьрли миллетли аьдемлерди ювыкластырады, бирбирининъ маданияты эм санияты ман таныспага демевлик этеди.
Россия маданият фондынынъ Дагестан филиалынынъ етекшиси Луиза Гаврилова оьз коьмекшилери мен «Меним элим» выставкасынынъ катнасувшыларына бек кызыклы эм эстен таймас шара уйгынлады. Выставкадан балалар йогары коьнъиллери мен эм оьзининъ яшаган ерин тагы да суьвретлерде коьрсетпеге уьйкен аваслыгы ман кайттылар.
Выставкадан сонъ бизге уьйкен разылык пан ата-аналар эм окытувшылар яздылар. Солардынъ сырасында Луиза Карповнадынъ бу куьнлерде Москва кала-
сында эмленип турган мезгилинде язган йоравы ман да сизи мен боьлисейим: «Яс суьвретшилерге наьсипли яратувшылык бактыды кеспи сайлавында йораймыз. Ак юректен олардынъ ата-аналарына, район етекшилевине выставкады уйгынламага бизди амаллы эткенлерине разылыгымызды билдире-
миз. С.Батыров атындагы саниятлар мектебининъ окытувшыларына Дагестан халкларынынъ маданиятын саклавга эм оьрлендируьвге, бизим балаларда яратувшылык аьдемлерди оьстируьвге каратылган янъы оьнер ой-ниетлерди
йораймыз».
Оннан оьзгелей выставкада катнаскан балалар эм олардынъ аналары оьз ойлары ман боьлистилер. Юлдыз Башиева – выставка катнасувшысы: «Мага бек ярады
шоьлдинъ, Дагестаннынъ маданиятын эм аьдетлерин ашык коьрсеткен суьвретлер, оларды коьрип сукланмага амаллы болганыма бек суьйинемен. Бек ярады мага кенъ эм ярык выставка залы. Бизди бек йылы йолыктылар эм ийги йоравларын айттылар».
С.Батыров атындагы саниятлар мектебининъ окувшысы Алтынай Муталлапова: «Бизим суьвретлер бек яркын, суьйинишке толган, ьойына коьре терен эдилер. Суьвретлерде биз тарихимизди, шоьлди, онынъ аьдемлерин коьрсетпеге
суьйдик».
Окувшыдынъ анасы Фируза Абейдуллаева: «Выставка уйгынлавшылары – Россия маданият фондынынъ регионаллы боьлигининъ куллыкшылары Дагестан халкларын бирлестирген аьлемет байрам оьткерер уьшин коьп куьш
салганлар».
Окувшыдынъ анасы Айнагат Аджигайтканова: «Бизим балалар суьйиништинъ, байрамнынъ дуныясына коьмилдилер. Оларга сол кадер йылувлык йораган конакларга уьйкен разылык». Ясмина Тенгизова: «Выставка залына киргенлей ок, бизим суьвретлер коьзге илиндилер – олар пейзажлар, портретлер. Выставка-
дынъ ашылувынынъ куьни бизим юреклерде мутылмас сезимлер
калдырды». Эльвира Авезова: «С.Батыров атындагы саниятлар мектеби уйгынлаган выставка аркалы бизим балаларымыз оьз яратувшылыгын коьрсетпеге амаллы болдылар. Биз баьри уйгынлавшыларга эм окытувшыларга балаларымызга эс эткенлери уьшин разылык билдиремиз».
Бизим саниятлар мектеби Дагестанда алдышылар сырасына киреди. Яс музыкантларымыз эм суьвретшилеримиз баьри регионаллык конкурсларда эм выставкаларда ортакшылык этедилер.
Олар ман сулыплы окытувшылар куллык этедилер. С.Батыров атындагы саниятлар мектебининъ художестволык боьлиги Россия маданият фондынынъ Дагестан филиалы ман биргелесте «Россия – меним тарихим» деген тарих
паркында биринши кере выставка уйгынлады. Саниятлар мектебининъ администрациясы эм суьвретши-окытувшылар бу куллыкты бардырмага суьедилер. Биз баладынъ яратувшылыгын коьтермеге тийислимиз. Яратувшылык аркалы саьбий анъ-эдап яктан бай болып оьседи, ол тек оьзининъ халкынынъ маданиятын эм саниятын уьйренип калмай, баска халклардыкы ман да кызыксынады, сол бир-бирине сый этуьвге демевлик этеди. Бизим мектебтинъ выпускниклерининъ баьриси де музыкантлар эм суьвретшилер болмайдылар, ама олар бизим оьз тувган ерининъ патриотлары, кайсы яктан да оьрленген аьдем, оьз халкынынъ ийги ваькили болып оьседилер.
Биз аьли де бир де спонсорлардан коьмек тилегенимиз йок. Олардынъ коьтергишлеви мен коьп шаралар озгармага болаяк эди, айтпага, Нефтекум районга, Ставрополь крайына, Астрахань областине, Карашай-Шеркеш
Республикасына эм баска регионларга экспозициялар элтемеге. Бек сенемиз, олар багетлер эм сисемен ярастырылган балалардынъ суьвретлерин коьширмеге коьлик пен ярдам этерлер. Уьйкен разылык билдиремиз Ногай район администрациясынынъ аькимбасы Д.Эсиргеповка, онынъ орынбасары М. Шадиевке эм баскаларга шаралар озгарувында колтыклаганы уьшин. Зейинли балаларды коьтергишлев келеекте оьз емислерин берер. Аьлиги заманда яс несилди бузатаган коьп себеплер бар. С.Батыров атындагы саниятлар мектеби –
ол балаларды ярасык дуныяга коьширген эм эдаплык яктан тербияаган киели ер болады.
С.Батыров оьзининъ кыска яшавын халкына багыслаган, суьвретлеринде куллыксуьер, юмсак, тынышлы ногайын коьрсеткен. Бек суьемен бизим яслар оьз халкынынъ тарихин, тилин билгенин эм С.Батыровтай аьдемге усаганын,
бизим шоьлди аяганын, саклаганын, баска халклар ман татымлыкта яшаганын эм Уллы Россиядынъ патриоты болганын.
А.Акбердиева,
ДР ат казанган маданият куллыкшысы, суьвретши-педагог.
Суьвретте: выставкадан коьринис.
