Ызгы занъ байрамы – аьр бир аьдемнинъ эсинде сакланатаган оьзгерис. Ол аьлемет мектеб йыллары тамамланганын белгилейди эм, озган ман аманласып, янъыга карап канатланмага заман келгенин билдиреди.
Суьйинишлерге, тынышсызланувга толы болган алдыдагы янъы яшавга йолландырган ызгы занъ янъыларда Кадрия атындагы мектебининъ выпускниклерине шалынды. Мундагы байрамга коьзлерин куваныш, соны ман бирге мунъаюв бийлеген окытувшылар, окувшылар эм ата-аналар йыйылганлар. Аьдетинше, мектеблердеги шатлыклы шаралар Россия байрагынынъ коьтерилуьви мен басланады, бу куьн оны 11-нши класс окувшылары Алихан Култаев пен Фаина Алиева коьтердилер. Линейкады юритуьвшилер Ибрагим Эсиргепов эм Милана Абдулмусаурова аштылар. Бу куьн коьп йылы йоравларын шатлык иелери – выпускниклерге Ногай район администрациясынынъ аькимбасынынъ орынбасары Мурат Шадиев, район ТИК председатели Зейдулла Аджибайрамов, РФ Социаллык фондынынъ Ногай район боьлигининъ директоры Мадина Абдулалимова эм мектеб етекшиси Альфия Акимова, класс етекшилери Зульфия Кидирниязова эм Росита Карагулова, биринши окытувшылары Альмира Махмудова эм Нурбике Кельдасова, ата-аналар атыннан Хамид Якубов эм Сайдат Байгараева айттылар. Аьр бир йорав таза булактан йол алып бараяткан окувшыларга кайдай ак ниетликке, алаллыкка, ян авырувга, суьйимге толы эди. Выпускниклер ортага шыктылар, оларга куьезленген юзлеген коьзлер карайды. Мине олар биринши класс окувшылары ман бирге йогарыга шарлар йибередилер, кишкейлерге китаплер савкатлайдылар, аьр бирисининъ ийги деген касиети белгиленеди, йылы караслар, соьзлер буьгуьн баьриси де – шатлык иелерине. Ярасык яслар ман кызлар эндиги вальс биювде айланадылар.
Шара барысында выпускниклердинъ туьрли олимпиадаларда, конкурсларда енъуьвши болганларына Сый грамоталар да тапшырылды. Бу исте окытувшылардынъ да косымы уьйкен, олар да Сый грамоталар ман белгилендилер. Окытувшыларына билимлер эм салган кыйыны уьшин разылык соьзлерин выпускниклер Джалил Мамутов эм Юлдуз Мурзагишиева айттылар.
Байрам оьзеги – ызгы занъ шалынмага заман етти. Оны бермеге ыхтыяр выпускниклер Низам Якубовка, Ассиль Манкаевага, Инсар Аюповка эм биринши класс окувшылары Фатима Шамбиловага эм Сафия Османовага берилди. Шалынады ызгы занъ. Балалардынъ яшавындагы мектеб шагы ызда калады, алдыда – патшалык сынавлар, яшав йолын сайлав, янъы мыратлар эм ойлар.
Нурият Кожаева.
Суьвретте: Кадрия атындагы мектебининъ 2025-нши йылдынъ выпускниклери.