Кырк кийик айынынъ сонъгы куьнлеринде Нариман авылында «Ногай Эл» аьдетли маданият фестивали уьй-
кен байрамга айланып озды. Авыл маданият уьйининъ кырында терме курылды. Онынъ иши кийгизлер мен,
бурынгы суьвретлер мен безекленди. Бурынгы ногай уьйининъ ортасында зияпетлерге мол сыпыра туьзилди, мунда
аьр бир конак сыйланды.
Байрам бойынша озган уьйкен концертте районымыздынъ авыл маданият уьйлери 2-3 номерден коьрсеттилер. Байрамда ортакшыламага озгарылатаган маданият шаралардынъ белсенли катнасувшылары Абидат Искакова (Ленинаул), Татлихан Рамазанова (Эдиге) шакырылдылар. Солай болып йыйылганлар алдына «Айланай» патшалык фольклорэтнографиялык эм «Карлыгаш» балалар ансамбльлери, Кумлы эм Бораншы авылларынынъ «Ритм» эм
«Ак шобан» биюв коллективлери, домбыра ойнавшылар Орта-Тоьбе авылыннан К.Боршакаев, Кара-Су авылыннан А.Джумагельдиев, Уьй-Салган авылыннан Т.Качикаев, Шумлелик авылынынъ биюв куьби Акуша биюви мен шыктылар.
Бек кызыклы эди Куьнбатар авыл маданият уьйи коьрсеткен «Тысав кесуьв» бурынгы ногай аьдети.
Оьз тавыслары ман бу куьн авыл яшавшыларынынъ эм конаклардынъ коьнъиллерин Нариман авылында тувып-оьскен РФ ат казанган маданият куллыкшысы Яхья Кудайбердиев, патшалык саз алатлар оркестрининъ солисти Мурат Байгазиев, йырлавшыларымыз Аминат Кудайбердиева, Алимет Аблезова, Зульфия Аджигеримова, Феруза Аманкаева, Гульназ Теркеева, А.Байгишиев, М.Бийбулатова коьтердилер.
Солай болып бу куьн яс катнасувшылар да оьз оьнерлерин коьрсеттилер, олар – Аделия Аджиниязова (Червлен-
ные буруны), Ясмина Алиева(Кумлы), Регина Аджиманбетова (Бораншы) Фестивальди озгарувда карыж яктан уьйкен коьмекти Нариман авыл аькимбасы Замир Суюндиков этти, авыл маданият уьйининъ куллыкшылары байрамды уйгынлавда белсенли катнастылар. Оларга баьри катнасувшылар атыннан разылыкты билдирмеге суьемиз. Фести-
вальдинъ аьр бир катнасувшысы дипломлар эм баалы савкатлар ман савгаландылар. Республикалык халк яра-
тувшылык уьйиннен Нариман авыл маданият уьйининъ етекшиси Эльмира Суюндиковага эм район Халк яратув-шылык орталыгынынъ етекшиси Солтанмурат Караяновка Сый грамота тапшырылды. Концерт программасын район
Халк яратувшылык орталыгынынъ методисти. ДР ат казанган маданият куллыкшысы Нина Халилова уйгынлады.
Н.Кожаева.
Суьвретте: фестивальден коьринис.