Ногай ясларымыз, Элимиздинъьтуьрли муьйислеринде оьз мырадларын яшавга айландырып, туьрли йогары окув ошакларында билим алып, ян шакырувы ман сайлаган исинде бийик уьстинликлерге етисип, баска миллетлер арасында халкымыздынъ атын айттырып, оны ийги ягыннан танытып келуьвлери аьр кайсымызды да куьезлендирмей, келеектегимиз уьшин оьктемситпей, юрегимизди оьстирмей озбайды.
Ногай районынынъ Карагас авылынынъ яс яшавшысы Джамал Оразбаевтинъ мектебте окыган шагыннан алып аьскерши кесписин байырлаякпан деген асыл уьмитининъ уьйкен йолга айланган куьни де етти. 2022-нши йыл мектебте патшалык сынавларын етимисли оьткен Джамалга йогары окув ошагынынъ эсиги кенъ ашылды. Сол куьн – онынъ яшавынынъ аьсиретли саклаган энъ наьсипли куьнлерининъ бириси эди. Буьгуьнлерде Джамал Санкт-Петербург каласындагы Михайловский аьскерши
артиллериялык академиясынынъ уьшинши курсынынъ курсанты. Мырадына етисер уьшин Джамал мектебте тек ийги белгилерге окып, спортка аваслыгы ман баскаланып,
мектеб яшавынынъ белсенли катнасувшыларынынъ бириси болып келди.
Джамал Ногай районынынъ Карагас авылында 2005-нши йылдынъ коькек айынынъ йырма сегизинши куьнинде Рустам эм Фарида Оразбаевлердинъ аьелинде тувган. К.Ш.Кидирниязов атындагы орта мектебинде билим алган. Бала шагыннан алып Джамалда окувга шалыскырлыгы, сахыйлыгы, эткен иси уьшин яваплылыгы артувы
сезилди. Окув йылларында мектеб бойынша аьрекетлейтаган краеведлик эм сондай баска кружокларына юрип, билимин кенъейтпеге шалысып келди. Ол класстынъ, мектеб, район, республика бойынша оьткен туьрли ярыслардынъ, олимпиадалардынъ, турнирлердинъ белсенли катнасувшысы болып, енъуьвши орынларын бийлеп келди. Айтпага, ийги окувшылар саныннан болган Джамалды 2019-ншы йыл мектеб
президенти этип те сайлаган эдилер. 2021-нши йыл етимисли окувшы «Умники и умницы Дагестана» деген окувшылар уьшин регион бойынша телевизионлык гумани-
тарлы олимпиададынъ шерик финалынынъ катнасувшысы да болган. Сондай ярыслардынъ тамамлары бойынша ол коьп кере Сый грамоталарынынъ, туьрли дипломларынынъ, баргылардынъ иеси болып келген.
Буьгуьнлерде курсант Санкт-Петербург каласындагы Михайловский аьскерши артиллериялык академиясынынъ ямагат яшавынынъ да белсенли катнасувшысы. Ийги
окыйтаган курсантка бийик етимислери уьшин 2024-нши – 2025-нши йыллар ишинде Элимиздинъ бас каласы Москвада Кызыл майданда Уллы Енъуьв Куьнине оьткен Парадында катнаспага да бакты буйырды. Ердесимиздинъ бас ниети – тийисли билим алып, юрек шакырувы ман сайлаган йогары аьскершилик кесписи бойынша Элине,
тувган ерине пайдалы болып, алаллыгын коьрсетуьв, ата-анасынынъ ога эткен сенимин аклав. Инилери Камал эм Алхаска Джамал коьримли уьлги болады. Буьгуьнлерде
оьз выпускниги мен тувган мектеби, билим берген окытувшылары, кардаш-тувганлары, авылдаслары оьктемсийдилер. Джамалды келеятырган Россия бойынша яслар бай-
рамы ман кутлай келип, ога алдыда йолы ашык эм етимисли болганын, окув сынавларын тийисли оьтип, бийикликлерге етисип, Элине, тувган шоьлине пайдалы болганды йораймыз!
Г.Нурдинова,
РФ Журналистлер Союзынынъ агзасы.
Суьвретте: Джамал Оразбаев.