Россия Федерациясында аьр йыл сайын казан айынынъ уьшинши каты куьнинде йол хозяйство куллыкшысынынъ куьни белгиленеди. 2026-ншы йыл бу куьн казан айынынъ 18-нши куьнине келеди.
Байрам яс байрамлар санына киреди. Тарихин алып карайык, биринши кере бу куьн РФ Президентининъ Указы ман 1996-ншы йыл Йол хозяйство эм автомобиль транспортынынъ куллыкшысынынъ куьни деп беркитилген эди, 2000-нши йыл болса, тагы да Россия Президентининъ Указы ман (23-нши мартта) бу байрам Йол хозяйство
куллыкшысынынъ куьни деп айтылып баслады эм йогарыда белгиленген куьнге токтастырылды.
Байрамнынъ белгиленуьвининъ бас ойы – патшалык уьшин транспортлы инфраструктурадынъ кайдай маьнеси барын коьрсетуьв.
Йол хозяйствосы – экономикадынъ бас кесеги, сонынъ оьрленуьвиннен коьп зат себепли болады. Айтпага, аьдемлердинъ юриси, катнасы, экономикалык оьсуьви, туьрли япсарларда яшайтаганлардынъ араларындагы байланыс, логистикалык еткеруьвлер, элдинъ коршаланувы…
Бу тармак бек уьйкен эм салдарлы дегенлер санында болады. Мунда 750 мынънан артык аьдемлер куллык этедилер: йол картасын туьзуьвшилер эм курувшы специалистлер, йолларды ярастырув эм искусственный курылыслар этета-
ган куллыкшылар ис аьрекетти бардырадылар.
Бу байрамнынъ белгиленуьви де бек ийги аьлде оьткериледи. Кайтип федераллык дережеде, соьйтип, кызыклы этип республикамызда да, бизим яшаган еримизде де бу кеспи иелери оьз байрамларын белгилейдилер.
Кеспидинъ ийги куллыкшыларына бу куьн сый этиледи, федераллык дережеде – «РФ ат казанган курувшысы» деген ат бериледи, баска ерлерде Сый грамоталар эм Разылык хатлар тапшырыладылар эм олар уьшин концерт програм-
малар аьзирленедилер.
Аьр бир оларга каратылган кутлав соьзде йол хозяйствосынынъ куллыкшыларынынъ ис аьрекетининъ уьйкен маьнеси бары – олар оьз ислери мен гражданлардынъ яшав сапатын эм соны ман элдинъ оьрленуьвин коьтеретаганы белгиленеди.
Галима Курганова.