Биринши кере бу байрам алдынгы СССР элимизде 1956-ншы йылдынъ 12-нши август куьнинде белгиленген. Сол байрамды 1955-нши йылдынъ 6-ншы сентябрь куьнинде алдынгы СССР Оьр Советининъ Президиумынынъ «Курувшы куьни» йыл сайынлык байрамды токтастырув акында» деген Указы ман беркиткенлер. Байрамнынъ оьзин ол замандагы патшалыгымыздынъ басшысы Н.Хрущев Эдил бойында курылып турган Куйбышев гидроэлектростанциясын коьргенде, сонынъ курылыс оьлшемине уьйкен тамаша этип, оькимет дережесинде курувшылардынъ кыйынын белгилемеге суьйип шыгарган. Дурысын айтканда, Уллы Аталык согысынынъ дуныя коьрмес бузылувларыннан сонъ, сав Элимизде турак уьйлерининъ, заводлардынъ, фабрикалардынъ, комбинатлардынъ, инфраструктура объектлерининъ уьйкен курылысы басланган. Патшалыгымыз сондай байрамды токтастырувы ман Аталыгымызды аягына тургызган курувшылардынъ куллыгына сый эткен. Курувшы ис кесписин бизим Ногай шоьллигимизде де бек оьрметлейдилер. Ызгы йылларда район еринде коьп янъы, заманга келисли турак уьйлер, байыр туькенлер, янъы мектеб меканлары, кайбир авылларда фельдшер-акушер пунктлары, балалар бавлары, маданият уьйлери курылып кулланувга берилгенлер. Йыл сайын демеге болады, район бойынша бир неше социаллык объектлерине капиталлык ярастырув ислери де этилинип барады. Кыскартып айтсак, быйыл район орталыгы Терекли-Мектеб авылында «Юлдыз» эм «Айсылув» балалар бавларынынъ, Дагестан патшалык музейининъ Ногай район филиалы уьшин алдынгысы район поликлиника меканы кайтадан ярастырылып кулланувга берилмеге деп аьзир этилинедилер. Оннан да алдынгы йылларда курувшылардынъ аьрекети мен районымызда янъы район больница, Нариман, Ленин, Орта-Тоьбе, Куьнбатар, Кумлы, Батыр-Мурза авылларында мектеб меканлары, Терекли-Мектебте орталык стадион курылдылар. Эки юз орынлы янъы мектеб меканы солай ок Шумлелик авылында да салынып турады. Былтыр А.Джанибеков атындагы орта мектеб меканына капиталлык ярастырув ислери оьткерилди. Курувшылар оьзлерининъ кайратлы иси мен яшавымызга янъылык аькеледилер, ярык эм йылы меканлар, йоллар, коьпирлер, электростанциялар эм коьп баска бизге керекли куллыкларды яшавга шыгарадылар. 

М.Юнусов.