Ногай район аькимбасы Джамалутдин Эсиргепов пан, кезекли кере яшавшылар кабыл этилинип, онынъ барысында социаллык маьнелиги болган эм гражданлардынъ байыр керексинуьвлери мен байланыслы соравлар каралдылар: СВО катнасувшысынынъ эстелигин оьмирлетуьв акында эм ерден тура гражданлардынъ байыр аьризелери. Йолыгыста СВО катнасувшысы, йигитлерше ян берген аьскерши Э.Суюндиковтынъ атасы, согыс аьрекетининъ ветераны Рустам Зарманбетов эм ян берген аьскершидинъ аданасы Михаил Чичинадзе катнастылар. Йолыгыс барысында йол инфраструктура аьли мен байланыслы, солай ок янъы орамларды электроярык эм газ бан канагатлав соравлары каралдылар. Йолыгыста район аькимбасынынъ ямагат кавыфсызлыгы бойынша орынбасары Мурат Шадиев, «Аталыгымыздынъ коршалавшылары» организациясынынъ председатели Аскер Межитов эм «Тавлар эстелиги» биригуьвининъ район боьлигининъ председатели Рустам Мустафаев ортакшылык эттилер. Айырым эс каратылды СВО катнасувшысынынъ аьптеси Калимат Лукмановадынъ баьтирдинъ эстелигин оьмирлетуьв акында тилек салган аьризесине. Район аькимбасы бу соравды байыр тергеви астына алды эм тийисли структураларга бу баславды яшавга шыгарув ман байланыста бир ой-токтаска келмеге тапшырды – эстелик тактасын салмага, авылдынъ янъы орамына атын бермеге яде муниципалитет амаллары ман келисте баска кеплер. Оннан баска болып, йолыгыс барысында солай ок Камальбек Карайдаровтынъ ерден тура байыр аьризеси ортага салынып каралды. Район администрациясы, яшавшылардынъ куьн аьлиндеги соравларын пайдалыгы ман шешилуьвин канагатлап, гражданлардынъ шагынувлары эм ой-маслагатлары уьстинде уйгынлык пан куллык этуьвди бардырады.