Тарумов районында «Ремонт и капитальный ремонт автомобильных дорог общего пользования местного значения» деген муниципаллык программадынъ «Дагестаным – меним йолларым» деген проекти яшавга шыгарылув бойынша А-Невская станицасынынъ Лесная эм Центральная орамларынынъ капиталлык ярастырувы тамамланды. 

Район етекшилеви ягыннан йолларды ярастырув А-Невская авыл аькимбасы Алишер Менглимурзаевтинъ белгилевине коьре, йолдынъ асфальт тоьсевининъ узынлыгы 1560 шакырым болады. Капиталлык ярастырув бойынша куллыкларын АО «Кочубейавтодор» подрядчиги толтырган. Куьшли иссиликке де карамай, «Кочубейавтодор» куллыкшылары алдына салынган борышын етимисли толтырдылар. Техника шыдамай, ислемей калган заманлар болса да, оны тез аьрекетлеп ясап, келисуьвлик борышлары тутылсын деп, куллыкшылар оьз аьрекетин яваплы толтырмага шалыстылар.

– Муниципалитетлердинъ савлай йол тармагы бир йорыктан ярастырылып болмайды. Ама «Ремонт и капитальный ремонт автомобильных дорог общего пользования местного значения» деген муниципаллык программасынынъ «Дагестаным – меним йолларым» деген проектин яшавга айландырув бойынша ислери этилинип келуьви мен аста-аста йоллар асфальт «кийип» келедилер. Бириншилей, сол зат авыл яшавшыларынынъ онъайлыгы уьшин этиледи. Ойлар эм мыратлар коьп, келисли тармаклардынъ байланысувы ман олар яшавга шыгарып келедилер. Ювык арарда АО «Кочубейавтодор» куллыкшылары ман Ново-Дмитриевка авылынынъ Колхозная эм Советская орамларынынъ йолына да асфальт тоьсев бойынша куллыклары басланаяклар, – деп белгиледи Тарумов районынынъ аькимбасы В.Джамалов.

Суьвретте: йол ярастырув ислерининъ барысы.