Дагестан Аькимбасы Сергей Меликов ДР Халк Йыйынына каратылган Язбасы ман шыгып соьйледи. Бу язба тек парламентке тувыл, савлай дагестанлыларга каратылган. Оьз язбасында Сергей Алимович республикадынъ оьрленуьвининъ приоритетлерин эм бас соравларын белгиледи, регионымыз алдыга карап йигерли баратаганына эс этти.
Ямагат яшавында, яс несилди тербиялавда маданияттынъ маьнеси уьйкен, сол боьтен де куьшли ызгы заман сезиледи. Маданият ясларга зейинлигин коьрсетпеге, дуныяга ашылмага ярдам этеди. Аьлиги заманда коьп музейлер, выставкалар ашылувы, туьрли фестивальлер озгарылувы ясларды несилден-несилге коьшкен халк баалыклары ман терен таныстырмага демевлик этеди. Яслар халкынынъ аьдетлери эм маданияты ман таныс болмаса, несиллер арасында ювыкласув бузылады.

Россия Президенти Владимир Путин маданият халктынъ бирлигин коьтергишлеп берклейди эм элимизге кыйынлы заманларда куьш береди деп айткан соьзлерине таянып, Дагестан Аькимбасы оьз Язбасында республикамыздынъ маданият учреждениелерин коьтергишлевдинъ маьнелигин белгиледи. Сергей Меликов ызгы 5 йыл ишинде «Маданият» миллет проекти бойынша коьп маданият учреждениелер, йогары технологиялар оьрленуьв оьмиринде заман талаплавларына келисли китапханалар эм концерт заллар ашылганын айтты.
Онынъ соьзлери мен, мынълаган специалистлер кеспи усталыгын оьстирдилер, солай ок халк яратувшылык эм саният тармагында уллы проектлер яшавга шыгарылды. ДР маданият министри Зарема Бутаевадынъ куьш салувы ман бу йыл регионымызда «Земский маданият куллыкшысы» деген проект яшавга шыгарылады. Белгиленген проект кеспидинъ абырайын оьстируьвге эм куллык-
шылар етиспевлигининъ маьселесин шешпеге каратылган.
Республика Аькимбасы Дагестанда маданият оьрленуьвине эс этуьви мен, яслар-
дынъ тербиясына да эс этип, регионымызды эм элимизди танълагысы куьн сенимли колларга тапшырувга себеплик этеди.
Нурият Кожаева.