Патшалык ногай драма театрынынъ коллективи «Шоьл тавысы» республикалык газетасынынъ бас редакторы, белгили ногай шаири, Россия Журналистлер эм Язувшылар союзларынынъ агзасы, ДР ат казанган маданият куллыкшысы, согыс аьрекетининъ ветераны, «Аталык алдында етимислери уьшин» деген орденнинъ 2-нши дережели медалининъ иеси Эльмира Кожаева ман йолыгыс оьткерди. Шарады Дагестан Язувшылар союзынынъ правлениесиндеги ногай секциясынынъ етекшиси, Россия Язувшылар эм Журналистлер союзларынынъ агзасы, ДР ат казанган маданият куллыкшысы Гульфира Бекмуратова Патшалык ногай драма театры ман бирге уйгынлап оьткерди. Ол Эльмира Кожаевадынъ поэзия эм проза шыгармалары барлыгын, солардынъ ишинде айлак та яшавдан замансыз кеткен зейинли шаир Кадрия Темирбулатовадынъ акында язылган киноповесть эм «Кумлы акында повесть» маьнели орынларды тутувын белгиледи. Соны ман бирге ол эки кесектен туьзилген «Алданганлар» эм «Кадрия» деген фильмлердинъ авторы болады деди. Гульфира Бекмуратова язувшыдынъ «Кумлы акында повестиннен» баслапкы бир неше сыдыраларды окыды. Муннан сонъ ол йыйылганларды Эльмира Кожаевадынъ яшав эм ис йолы, казанган савгалары ман таныстырды. – Эльмира Кожаева маданият тармагында ислеген, сонъ Дагестан Республикасынынъ Халк Йыйынынынъ депутаты болган, сонда яваплы ис орынында куллык эткен, коьп йыллар коьлем информация амалларында эм буьгуьн де бу тармакта эндигиси «Шоьл тавысы» республикалык газетасынынъ бас редакторы болып ис аьрекетин бардырады. Эльмира Кожаева Дагестан Аькимбасынынъ Сый Грамотасы, РФ Государстволык Думасынынъ депутаты Бийсултан Хамзаевтинъ эм ДР Оькиметининъ Разылыклары, ДР Халк Йыйынынынъ Председатели атыннан баалы саьат пен савгаланган, «Алтын карагус» Дагестан журналистлер баргысынынъ лауреаты болады. Эльмира Кожаева оьзининъ соьзин Патшалык ногай драма театрынынъ коллективине эм сонынъ етекшиси Гульфия Кокоевага ога сондай сый эткенине разылык билдируьвиннен баслады. Онынъ айтувы ман, газетадынъ редакциясы коьп йыллардан бери театрдынъ меканы ман ювык конъысы болып ислейди. Театрдынъ актерлары Кадрия акында художестволыдокументальлик фильминде катнасканлар. Солай ок олар «Алданганлар-2» деп аталган фильмди аьзирлевде де ортакшылык эткенлер. Эльмира Кожаева театр актерларына кайтип Кадрия акында киноповесть язганы акында хабарлады. Соны эскеруьв уьшин, онынъ айтувы ман, 1993-нши йылга кайтув керегеди. Сол йыл айтылган ногай йырлавшысы Зухра Шандиева аьли де аман эди. – Биз оны ман кыймаслар тувыл эдик, ама бирбиримизди аьруьв билгенмиз. Биз Зухра ман белгили фотосуьвретши Владимир Уразакаевтинъ студиясында танысканмыз. Ол сол куьнлерде Алма-Атыдан, халклар ара «Азия даусы» фестивальден келген эди. Сонда ол катнасып, бизим юреклерди оьктемликке толтырып, финалистлер сырасына кирди. Зухра мага сондагы казах кинорежиссерларына бизим Кадриядынъ кайгылы бактысы акында хабарлаганы акында айтты. Олар Зухрага, эгер бирев онынъ акында киносценарий язса, оьз ягыннан Кадрия акында фильм шыгармага аьзир экенлерин билдиргенлер. Соны ман ол мени коьргенде: «Тек ким бизде онынъ акында язсын?» – деп куьрсинди. Сол аьсерде мен ога таьвекелли эм берк кепте: «Мен язарман!» – деп явапладым. Оьзим болсам киносценарий дегенди бир де язбаганман эм сол кайтип язылатаганы ман да карсы болмаганман. Сол йылларда интернет деген зат та йок, оьзим де яс эдим. Зухра Шандиева сол фильмде оьзи бас рольди ойнар эдим деген ойын билдирди. Бу затты эситкенде, мен ога: «Мине сен Кадрияга усайсынъ!» – дедим. Дурысын айтсам, мен ол заманларда Кадриядынъ биографиясын толы кебинде билмейтаган эдим, – деди Эльмира Кожаева. Сол йыл ол конъысы Ставрополь крайынынъ Нефтекум районынынъ Коясыл авылына куллык этпеге кетеди, сонда белгиленген фильм акында киноповестьти язып баслайды эм кутарады. «Зухра Шандиева бу фильмде Кадриядынъ ролин оймага керек эди, ама, уьйкен оькинишке, ол сол йыл, Кадрия кимик, анъсыздан оьзи де замансыз яшавдан тайып кетти…», – деди Эльмира Кожаева кайгылы кепте. Куллыгын кутарган сонъ, ол Терекли-Мектебке, Кадриядынъ ата-анасынынъ уьйине келеди эм, оларга сол киноповестин калдырып, оьзи аьптеси Зинаида Коштакова уьйине кетеди. Экинши куьн эртенъликте Кадриядынъ ата-анасы оны уьйлерине шакыртып артыннан автомашина йибередилер. Олар Эльмира Кожаева бу киноповестин шаирдинъ яшавы эм биографиясы ман аьруьв кепте таныспай, соны язганына уьйкен сейир этедилер. Сол ок куьн Кадриядынъ атасы – Уллы Аталык согысынынъ ветераны Оразбай Коьгий увылы ога окымага деп Кадриядынъ кол ман язылган, аьли де бир ерде де баспаланмаган «Шарль Бодлер мен йолыгысув» («Встреча с Шарлем Бодлером») деген повестин окымага береди. – Сол повестьти окыган сонъ, эндиги мен уьйкен сейирге калдым!.. Неге десе, мен соны яшавымда бир кере де окымаган эдим! Мине сол заман мен бу киноповестьти оьзим ялгыз язбаганымды анълап басладым. Бу зат бийиктен, бир зат пан аьмир болып, мага оьз яшавы акында билдирип меним киноповестиме Кадрия оьзи йиберген эди!.. Мине сондай аьлемет кепте менде Кадрия акында повесть язылды. Бу киноповесть ишинде шаир кыздынъ яшавыннан алынган коьп дурыс затлар бар. Сонынъ акында тагы да бир шайытлама келтирейим. Мен бу повестьти грамматика ягыннан тергеп карав ниет пен районымызда белгили окытувшы, филолог Кезибан Анвар кызы Батыровага берген эдим. Ол соны окыган сонъ, Кадриядынъ акында мен язган бир неше затларды дурыс деп белгиледи. А мен язаяткан аьсерде солардынъ акында бир зат та билмегенмен! Бу зат тагы да бир кере киноповесть мага йогарыдан йиберилгенин шайытлайды, мен тек сол затты оьз колым ман яшавга шыгардым. Ол, дурысын айтсам, Кадриядынъ оьзининъ эрки болган болар деп ойлайман, – деп белгиледи оьзининъ соьзинде Эльмира Кожаева. Шарада солай ок белгили ногай литераторы, журналист Магомет-Али Ханов та Эльмира Кожаевады коьп йыллардан бери таныйтаганы, онынъ оьнер дуныясы, ол етекшилик эткен йыллар ишинде газетадынъ редакциясында болган коьп ийги туьрленислер акында хабарлады. Йолыгыстынъ ызында солай ок Патшалык ногай драма театрынынъ художестволык етекшиси Гульфия Кокоева Эльмира Кожаевага йолыгыска келгени эм айткан хабары уьшин уьйкен разылыгын билдирди. Ол коллектив атыннан ога саламлав йоравларын тапшырды. Шарада театрдынъ белгили актерлары Оразбийке Кокоева, Салимет Ханмурзаева, Райганат Суюндикова эм баскалар коьнъилли кепте Кадрия Темирбулатовадынъ ятлавларын окыдылар. 

М-А.Юнусов. Суьвретте: йолыгыстынъ катнасувшылары.