Белгили Дагестан шаири Расул Гамзатовтынъ аты тек Дагестаннынъ тысында белгили болып калмай, онынъ туьрли тиллеринде язылган шыгармалары ман аьдемлер тыс эллеринде де таныс боладылар. Коьп миллетли, политика эм дин бойынша туьрли ой-токтаслары болган аьдемлер де шаирдинъ соьзлерине язылган йырларды йырлайдылар эм тынълайдылар, онынъ ятлавларын уьйкен коьнъил мен яттан окыйдылар. Туьрли кеспили эм неше ясында да аьдемлер, Омар Хаямнынъ доьртликлериндегиндей болып, Расул Гамзатовтынъ яратувшылыгында да оларга каратылган сыдыраларда яшав йолында адаспага амал бермейтаган бас маьнеди табадылар. Шаирдинъ яратувшылыгынынъ акылбалыгы эм маслагат беруьви кайсы заманларда оьз орынын табып, яшав кыйынлыкларын да шешпеге ярдамласады.
Ат асыллавшы аьдемлер де Россия Федерациясынынъ Президенти В.Путиннинъ Р.Гамзатовтынъ 100 йыллык мерекесин байрамшылав бойынша буйрыгын кабыл коьрдилер. Оннан алдын, уьстимиздеги йылдынъ коькек айынынъ 23-нши куьнинде Ногай районынынъ Куьнбатар авыл ипподромында Ораза байрамында дагестан шаири Р.Гамзатовтынъ 100 йыллык мерекесин байрамшылавга багысланган баргысына 1200 метр ерге оьткен ат шабыслары уйгынланган эди. Сол ярыста сыйлы баргы уьшин ат шабыстынъ енъуьвшиси Шешен Республикасыннан Фантастик Сонг деген аты болды.
Бу йылдынъ сары тамбыз айынынъ 20-ншы куьнинде Дагестаннынъ Ногай районынынъ «Кунбатар» ат клубынынъ баславы бойынша дагестан шаири Расул Гамзатовтынъ 100 йыллык мерекесине багысланган баргысына ат шабыслар Ростов ипподромында да оздылар. Ростов ипподромынынъ администрациясы сыйлы баргы берилуьв бойынша баславын хош коьрип алды эм «Кунбатар» ат клубына савлай дуныяга белгили шаир Р.Гамзатовтынъ мерекесининъ сыйына багысланган баргыды карыжламага разылыгын берди.
Ат шабыс озган ердинъ басыннан алып сонъына дейим ярыстынъ баьри катнасувшылары да, тап ел кимик, юйрик шабып еттилер. Солай болып, яны авырыган каравшылар трибунада ат шабыстынъ енъуьвшиси бир такыйка ярымнынъ ишинде келуьвине аян шайыт болдылар. Соьйтип, «Кунбатар» ат клубыннан (иеси Фазиль Койлакаев) торы аргымак Радомир 1400 метр ерди 1. 27.43. заман ишинде йортып йогары тамамын коьрсетти. Ипподромнынъ трибунасыннан каравшылар 2-нши дережели жокей Кристина Сухорададынъ телбегиди колында сулыплы эм наьзик юритип болувына сукланып карадылар. Кристина Сухорада ат уьстине усташа минип болувы ман белгили болып калмай, канында катыслыгы болмаган аргымакларын да оьстируьвде уьлисин косып келеди.
Сонынъ уьшин де болар аргымак Радомир Кристинадынъ иерининъ астында сенимли енъгени де. Енъуьвшиге баргы шатлыклы аьлде тапшырылды. Ростов кала ипподромынынъ бас етекшиси Дмитрий Камфарин ярыс енъуьвшисине кубок, акшалай баргысын эм савга эсабында Расул Гамзатов атындагы фонды атыннан Дагестан шаирининъ китаплер комплектин тапшырды. Баргыды тапшырувда Дондагы Ростов каласындагы «Дагестан халклары» деген маданият-ял алув орталыгы бойынша етекшилевининъ председатели Гаджи Мирзоев те бар эди.
Амирхан Межитов.
Суьвретте: ат шабыстынъ енъуьвшиси Радомир эм жокей К.Сухорада.
