Республика бойынша
Гульфира Бекмуратова
Дагестан Республикасынынъ Оькимет уьйинде регионымыздынъ премьер-министри Абдулмуслим Абдулмуслимовтынъ етекшилеви астында оьткен кенъесте мектеблердинъ янъы окув йылына аьзирлиги ойласылды. Шарада эки сорав каралды – 2024-нши йылдынъ Биргелес патшалык сынавдынъ озгарылувынынъ сырагылары эм республика мектеблердинъ 1-нши сентябрьге аьзирлиги.
Докладлар ман ДР билимлендируьв эм илми министри Яхья Бучаев, Дагестан бойынша Роспотребнадзор управлениесининъ етекшиси Залимхан Омариев, муниципалитетлердинъ аькимбаслары шыгып соьйледилер. Бу соравлар ДР Оькиметининъ председатели Абдулмуслим Абдулмуслимовтынъ етекшилеви астында каралды.
Патшалык сынавлары акында айтылганда, быйылгы сырагылары ман оьктемсимеге боламыз деп белгиленди – 100 балл 49 окувшы алган эм 700-ден артык выпускниклер сынавларда 90 баллга бердилер. Бу бек ийги коьрсетуьвлер. Дагестан Республикасынынъ аькимбасы Сергей Меликовтынъ баславы ман, эки эм йогары сынавлардан 95 баллар алганларга 100 мынъ маьнет акша берилеек.
Мектеблердинъ 1-нши сентябрь куьнине аьзирлиги 75 процент болады. Быйыл капиталлык ремонтлав ислери 10 мектеблерде оьткен, олар аьлиги заманга балаларды киргизбеге аьзир. Быйыл билим куьнинде капыларын 21 янъы мектеблер эм бир балалар бавы ашаяклар. Муниципалитетлердинъ аькимбасларынынъ айырым эсин министрлер кабинетининъ етекшиси мектеблерди терроризмге карсы эм пожарный кавыфсызлыкты аьжетсизлевге каратты.
Солай ок билимлендируьв учреждениелерде санитарлык талаплавлар эм йорыклар тутылмага керекли. Быйыл Дагестан Республикасынынъ баьри мектеблери МЭШ электрон дневниги бойынша аьрекет этееклер.
Абдулмуслим Абдулмуслимовтынъ айтувы ман, билимлендируьв организацияларынынъ аьзирлик коьруьв ислери сары тамбыз айдынъ 19-ншы куьнине битпеге керекли.
