Автор Нурият Кожаева
Эки йыл эм бес айдан бери барады согыс спецоперациясы. Бизим йигитлер Уллы Аталык согысында катнаскан атайларымыз коьрсеткен йигитлигине тийисли баьтирлик коьрсетедилер. Аьр бир элимиздинъ яшавшысы СВО- ман байланыслы болган билдируьвлерге, алдышылыкта оьз яшавын эм савлыгын сынавга салган йигитлердинъ хабарларына уьйкен эс этедилер, аьр кимнинъ ойы, тынышсызланувы согыс спецоперациясы ман эм мыратлары СВО Россиядынъ енъуьви мен тамамланувы ман байланыслы.
Меним кишкей ногай халкым да оьз Элин коршалавга коьп йигитлерин йиберди. Олардынъ сырасында баьтир атка тийисли болганлар да аз тувыл, яшавын курман эткенлер де оькинишке бар. Алдышылыкка бир неше кайта шыгып, каты яраланганлар да расадылар. Олардынъ сондай кыйын аьллерге туьскени бизге оьзек те кайгылы, тек оьктемсимей болмайды юреклер оьз йигитлери эм Эли уьшин.
Дагестан Республикасынынъ Кумлы авылынынъ яшавшысы Азамат Джумагишиев СВО озып турган ерге оьз эрки мен уьстимиздеги 2024-нши йылдынъ апрель айында йолланады. Баска аьскер аьрекетшилериндей болып ол Луганск каласында учебкады оьтеди. Мине аьзирленуьвлерден сонъ, куьнлер боьлинеди аргы эм берги дуныядагыга, яшав боьлинеди согыс спецоперацияга дейим эм сонъ дегенге. Спецоперация аьр биревди туьрлендиреди, ондай аьллер аьдемди туьрлендирмей болмайды. Бизим ердесимиз алдышылыктан биринши кере енъил ярасы ман, экинши кере де яраланып, уьшинши кере болса каты яраланып кайтады. Ызгы кере алдышылыкта ол 17 куьн узагында болады. Бу куьнлерде Азамат Боранбай увылы Москва каласындагы госпитальде эмленеди. Ол ягына куьллели яра алган. Бу куьнлерде СВО катнасувшысы – бизим заманнынъ баьтири мен тел согып соьйлемеге амалымыз болды. Ога бу куьнлерде Элимиз эм онынъ келеектегиси уьшин энъ де маьнели оьзгерислерде катнаскан куьнлери акында сорадык.
Азамат Джумагишиев Хабаровск каласында танк войскаларында аьскер аьрекетин бардырган, сонъ Грозный каласында МВД иш ислер боьлигинде кесек заман куллык эткен.
– Меним касымда СВО -да эки дагестанлы бар эди, эки яс та кумык миллетли, олардынъ биреви ян берди, экиншиси бу куьнлерде Санкт-Петербург каласында госпитальде эмленеди. Согыс спецоперация озып турган ерде, боьтен де алдышылыкта аьдемлер миллетлерге боьлинмейди, аьр ким касындагы ман агали-инилидей ювык эм аьзиз болады. Аьр кимди сакламага суьесинъ. СВО -да элимиздинъ аьр бир миллетининъ увылы явды согады, бар орыслар да, дагестанлылар да, калмыклар да…Тек онда болган аьдемлер туьрленедилер, юреклери юмсаяды. Мен аьли Москва каласында орамда коьрген орыс миллетли ясларды СВО-дагы орыс кеделер мен тенълестирсем, айлак баска десем де аз болар. Кайдай кыйынлы эм ашшы болса да, СВО Россия халкларын боьтен де бирлестирди. Мен ызгы кере каты яраланганда, касымдагы авар миллетли йигит рация ман 4-нши куьн билдируьв этпеге амал тапты. Бесинши куьн меним артымнан Бахмуттан эки аьдем келди, олар мени алдышылыктан 15 шакырым ер артка аькеттилер. Баслап Ростов каласында эмлендим, аьли Москвада. Мунда бизим баьримизди де тенъ этип карайдылар.
Бизим Россия аьскер аьрекетшилери аьдемшилигин дав майданда да йоймайдылар. Есирге туьскен украин аьскершисиннен биз олардынъ аьлин, савыт-садагы ман канагатланувын сорадык, бирев де ога бир кишкей де зыян келтирмеди. Сонъ оны штабка элтедик. Аьли украин нацистлерин бизге карсы эллер керекли затлар ман канагатлайды. Дав буьгуьн яде танъла тамамланмаяк. Тек сенемиз эм билемиз СВО-дынъ да сонъы эм бизим Енъуьв келер. Согыс спецоперация кутылса да, явдынъ кишкей куьплери кайдай болса да зыянын келтирмеге амал излерлер. – деп хабарлайды Азамат Джумагишиев.
Уьйинде СВО катнасувшысын увылы Ислам ман кызы Зейнап сагынышлы куьтедилер. Дуныядан кешкен хатыны Сакинатты да юрек дерти мен эсине алады Азамат Джумагишиев. Кайтса экен тез арада уьйлерине аталар, бир де амалсыздан, сондай кыйын аьллер мен байланыслы болып, узак болма са экен ювык аьдемлер бир-бириннен.
Суьвретте: Азамат Джумагишиев.
