Автор Любовь Уразаева
СССР элимиз бузылган сонъ оьрдеги политиклер халкты бирлестируьв белгисининъ йолларын хыйлы заман излестирдилер.
Ызында солардынъ коьбисининъ ойы ман Халк бирлестируьв куьни деп 4-нши ноябрь куьнин токтастырдылар. Сол куьн тарих бойынша 1612-нши йылда Кузьма Минин мен Дмитрий Пожарскийдинъ етекшилиги мен туьзилген ополчение аьскерлери Москвадагы Китай-калады босатып, бассапырык заманына токтав белгисин салганлар.
Россия патшалыгы уьшин сол куьн Аталыктынъ тарихининъ янъы кезеги басланган деп санайды РФ Государстволык Думасынынъ депутаты Вячеслав Фомичев. Соннан бир йыл оьткен сонъ 1613-нши йылда Михаил Федорович – Романовлардынъ тукымыннан биринши патша такка олтырган. Бу тукым 300 йылдан артык заман Россияды басшылап келген.
«Сол куьн бизге тек бизим йигерли ата-бабаларымыздынъ йигитлиги акында тувыл, ама буьгуьнлерде Тувган Элимиздинъ эркинлиги уьшин согысып турган бизим коршалавшыларымызды да эске салады. Бизим бирлигимиз – ол бизим куьшимиз деп сенемен. Патшалыгымыздынъ Савытлы куьшлерине енъуьвди йорайман!», – деген Фомичев.
1612-нши йылда Минин мен Пожарский басшылаган ополчениединъ Москвады босатувы элимизге суверенитет, политикалык эм экономикалык соравларымызды шешуьвде эш биревге де бойсынмаслык ыхтыярын берген деп санайдылар коьплеген россия политиклери мен аьлимлери.
Эндигиси бу куьнлерде де биз тап сол заманга усаган аьлди коьрип турамыз. Россия куьнбатар эллердинъ дейвансызлыгына карсы шыгып, оьзининъ экономикалык эм политикалык суверенитетин алув йолында. Буьгуьнлерде юритилип турган СВО аьрекети – ол Россиядынъ оьз алдына оьрленуьв йолы эм келеектегиси уьшин куьреси.
Дурысында, Россия эм онынъ яшавшыларында бизим янымыз эм сенимлигимиз бен казанылган оьз байыр тарих йолы бар. Элбетте, туьрли ойлар кайсы заманларда да болганлар эм айтылганлар.
Болса да халкымыздынъ патшалык тоьгерегинде тыпакласувы, бизим оьз алдымызга оьз эркинлигимизди алмага суьйимлигимиз баьри заттан да куьшли.
Россия кайсы заманларда да оьзининъ коллективизми мен тири эм куватлы болып келген. Бизим еримизде онсыз яшамага кыйынлы. Оннан баскалай, мунда туьрли миллетлердинъ ваькиллери юзлеген йыллар узагында яшаганлар эм коьп оьмирлер бойында аьлемет бирлигимиз туьзилген.
Буьгуьнлерде бизге туьрли ой-ниетлеримизге эм ой-карасларымызга карамастан, бир болганымыз бек маьнели. Россиядынъ куьши – бирликте!
