Коькек айынынъ 12-нши куьнинде Россия Федерациясынынъ Савытлы Куьшлерининъ сырасына кызмет кылмага Кизляр районыннан 10 ясларды йолга салдылар.
Шатлыклы йолга салув шарасы Дагестан Республикасынынъ Кизляр, Южно-Сухокумск калаларынынъ эм Кизляр районы бойынша аьскершилик комиссариатында озды. Аьскерге ясларды йолга салмага, олардынъ яшавындагы маьнели оьзгерис пен кутламага Кизляр район администрациясынынъ ваькиллери, аьскерге шакырув боьлигининъ куллыкшылары, авыл аькимбаслары, СВО катнасувшылары, баска болып, аьскерге бараяк яслардынъ кардаш-тувганлары келген эдилер.
Шарады Кизляр, Южно-Сухокумск калаларынынъ эм Кизляр районынынъ аьскерши комиссары Рамазан Курамагомедов ашты эм оьз соьзинде аьскер сырасында кызмет этуьв шагында ясларымыз беркип, аьскершилик аьрекетининъ баьри сулыпларына да уьйренген шынты аьскершилер болып кайтатаганын белгиледи. Кизляр районынынъ аькимбасы Аким Микиров атыннан онынъ орынбасары Тимур Гаирбеков та аьскерге йолланган ясларга йылы йорав соьзлерин айтты: «Сизге, аьскер сырасын етимисли тамамлап, тувган районынъызга аман-эсен кайтканынъызды йорайман. Аьскер сырасы сизге яшавдынъ ийги мектеби болаягына сенемиз. Онда сизинъ касиетинъизди беркитип, шынты эрлер болып кайтаягынъызга соьз йок. Элбетте, кыйын да, авыр да болар, ама баьри затты да енъмеге болады», – деди.
Айтып озайык, Россияда язлык шакырув кампаниясы 2025-нши йылдынъ коькек айынынъ 1-нши куьниннен алып шилле айынынъ 15-нши куьнине дейим бардырылаяк.
Аьскер сырасына кеткен яслар СВО ерине борыш толтырмага йиберилмееклер.
Суьвретте: ясларды аьскерге йолга салув мезгили.