Дагестан Республикасынынъ Аькимбасы Сергей Меликов «Движение Первых» региональлик боьлик пен катнас бойынша Координационлык советининъ йыйынын оьткерди. Онынъ соьзлерине коьре, «Движение Первых» Дагестанда 337 мынъ аьдемлерди бириктирди, баьриси республикамызда 1535 биринши эм 52 ерли боьликлер
аьрекет этедилер. «Движения Первых» региональлик боьлик эки йыл узагында бел-
сен аьрекетти бардырады. Сол кыска болжал ишинде коьп куллыклар этилдилер, куьннен куьнге патриотлык проектлер мен кызыксынатаган яслар саны да оьсип турады. Олар
катнасатаган проектлер баьриси де тарихлик эсти саклавга эм ясларды солардынъ негизинде тербиялавга каратылган.

Бу куьнги йолыгыста регион етекшиси 19 мынъ дагестанлы аьеллер ортакшылык эткен «Тарихти саклавшылар», «Биз – Россиядынъ гражданлары», «Енъуьв терезелери» проектлерди белгиледи. Солар баьриси де оьзлерининъ тийисли ызын бизим яшав оьмиримизде калдыратаганын да айтып кетти.

– Сол аьдетлерге сый этуьв болады. Бизди бек суьйинтеди, балалар, биз бирге тарихимизди билетаганымыз эм соны ман да оьктемсиймиз, – деди ол.
Солай ок ДР Аькимбасы айырым соьзди бу куьн мунда ортакшылык эткен «Движение Первых» козгалысынынъ туьрли ерлерден барган агзаларына да карат-
ты:
– Бизим яслар республикадынъ ийги атын кайсы ерде де шыгарады. Олар савлайроссиялык шараларда оьз ойларын билдирип, Эл уьшин куллык этетаганларын коьрсетедилер. Биз де оьз ягымыздан сизди колтыклаякпыз. Аьр биринъизге ден савлыкты, куьшти эм акыллы болувды йорайман. Кайсы ерде де белсенли аьрекетинъиз пайдалы болсын, – деди Сергей Меликов.

Бизим хабаршы.
Суьвретте: Орта-Тоьбе орта мектебининъ «Движение Первых» козгалысынынъ агзалары етекшиси Н.Сагиндикова педагогикалык ис ветераны М.Эстуганова ман.