Уьстимиздеги йылдынъ курал айында Тарумов районынынъ Новодмитриевка авылында оьткен шатлыклы турнир Уллы Енъуьвдинъ 80 йыллыгына, солай болып, белгили ногай ярыкландырувшы, аьлим А-Х.Джанибековтынъ эстелигине эм авылдынъ негизленген куьнине де багысланып шатлыклы аьлде озды.
Сол куьн турнир Ставрополь крайыннан, Шешен, Дагестан Республикаларыннан сегиз командаларын бирге йыйды. Регионлар ара шарады хошлав соьзи мен Новодмитриевка авыл администрациясынынъ аькимбасы Рашид Яналибиевич Манапов, авыл маданият
уьйининъ етекшиси Эмма Янгазиевна Арсланбекова аштылар. Олар оьз соьзлеринде байрамга йыйылганларды Уллы Енъуьвдинъ 80 йыллыгы ман, Новодмитриевка авылынынъ тувган куьни мен кутлап, турнирде ойнаяк командаларына етимисли ойынын, уьстинликлерин, байрам кызыклы болып оьткенин йорадылар.
Турнирде тиресуьвли ойынынынъ тамамы бойынша Нефтекум районынынъ Каясула авылыннан команда – биринши орынга, Новодмитриевка авылыннан «Чубутла» команда – экинши орынга, Нариман авылыннан футбол ойнавшылары – уьшинши орынга тийисли болдылар. Шара бойынша айырым номинацияларда ийги ойнавшылар, айтпага, вратарь, коршалавшы эм корсаланувшылар айырымланып белгилендилер.
Шарадынъ энъ кызыклы кесеги маданият эм тыншаюв паркынынъ язгы сахнасында оьткен гала-концерт эди. Солай болып, концертте «Айланай» Патшалык фольклор-этнографиялык ансамбли, ногай патшалык драма театры ортакшылык эттилер. Концерт программасы бойынша «Ногай Эл», «Ярыгым меним», «Королева» эм сондай баска йырларды Дагестаннынъ халк артисти Фатима Нурлубаева, ДР ат казанган артисти Мурат Ваисов, Азиза Межитова йырлап эситтирдилер эм театр артистлери «Кудагайлар» спектаклиннен кесегин эм «Меним Россиям – меним уьйим» деген согыс-композициясын уьстинликли коьрсеттилер. Ансамбльдинъ балетмейстер-салувшысы, ДР ат казанган артисти Альмира Орашевна Тунгатаровадынъ етекшилиги астында «Айланай» ансамбли «Ногай кыз», «Айланай» биювлерин, хореограф Альфия Бавдиновна Аджибатыровадынъ етекшилеви астында «Айланай» ансамбли бойынша туьзилген «Ай-Айданак» биювлер студиясы «Данък» деген биювин оьнерли бийип коьрсеттилер. Артистлер шара конакларына эм авыл яшавшыларына оьз усталыкларын коьрсетуьви мен, миллет анъы ман байрам коьнъилин савкатладылар. Концерт карс кагувлар ман эм йыйылганлардынъ оьз разылыкларын билдируьвлери мен тамамланды. Байрам конакларын миллет ашханасынынъ аслары ман да сыйладылар.
Соьйтип, Новодмитриевка авылында озган байрам йылы коьнъилде, дослык аьлде уйгынланып оьтти.
Г.Нурдинова.
Суьвретте: шарадан коьринис.
