Курал айынынъ 29-ншы куьнинде Дагестан Республикасынынъ Аькимбасы Сергей
Меликов ДР Халк Йыйынынынъ алдында аьдеттеги Язба ман шыгып соьйлеек. Быйыл
республикамыздынъ басшысынынъ соьйлевин тек депутатлар тувыл, журналистлер,
власть органларынынъ эм ямагат организацияларынынъ ваькиллери, блогерлер тынълаяклар.
Сергей Алимович маьнели соравларынынъ бириси -СВО катнасувшыларына эм олардынъ аьеллерине ярдам этуьви акында айтар деп шеклен меймиз. Онынъ айтувы ман, коьмек этуьв соравы Россия Президенти Владимир Путиннинъ тергеви астында турады. Федераллык эм региональли дережеде этилинетаган коьтергишлев амаллары специальли согыс операциясы басланганнан алып белсен кулланылады. Республикадынъ муниципалитетлеринде де СВО катнасувшыларынынъ аьеллерине баьри яктан да коьмек этилинеди. Оьз Язбасында республика басшысы тагы да бир соравды коьтерер социаллык объеклердинъ, солардынъ ишинде мектеблер эм балалар бавлары, курылысы. 2024-нши йылда Дагестан Республикасында 23 ортак билимлендируьв мектеблер эм 5 школага дейимги учреждениелер кулланувга берилген. Сол билдируьвди ДР билимлендируьв эм илми министри Яхья Бучаев берген. 2024-нши йылдынъ яй айларында Сергей Меликов регионда 43 билимлендируьв объектлер салынаятырганы акында айтты. 2025-нши йылдынъ планына коьре, аьли де 15 мектеблер салынаяк, солардынъ 9 курылысы битирилеек. «Яслар эм балалар» эм «Аьел» патшалык программаларды яшавга шыгарув аьрекетинде 2 мектеб эм 6 балалар бавы курылаяк. Сергей Меликовтынъ айтувына коьре, билимлендируьв учреждениелерининъ курылысы сапатлы болув керекли, неге десе биз оларды балалар уьшин саламыз. Дагестан аькимбасынынъ келеетеги планларында – мектеблердинъ ремонтлав ислерин бардырув.
Сергей Алимович Меликовка эки номинацияда етискен уьстинликлери бойынша – курылган эм ремонтланган мектеблердинъ эм балалар бавдынъ санына коьре вицепремьер Татьяна Алексеевна Голикова баргылар тапшырды.
Дагестан Республикасынынъ Аькимбасы Сергей Меликовтынъ Язбасы тек этилинген исининъ эсап беруьви тувыл,
ол – келеектегиге планлар, дагестанлылардынъ бар маьселелерин шешуьв. Республи-
кадынъ аьр бир яшавшысы бу маьнели оьзгеристи тынъламага эм карамага болады. Сол да бек керекли, неге десе тек сол заман «власть – халк» диалогы ислемеге болады. Сол диалог ашык болувына каратылган Дагестан басшысынынъ аьрекети дагестанлылардынъ
яшавынынъ сапатын ийгилендируьв эм оьткир, актуальли соравларды шешуьв амаллары.
Г.Бекмуратова,
Россия Язувшылар союзынынъ агзасы.
