Янъыларда Сургут каласынынъ ерли яслар уьшин союзынынъ уйгынлавы ман «Не зат? Кайда? Кашан?» деген интеллектуаллык ойыны шатлыклы аьлде уйгынланып озгарылды. Ойын сол куьн, онынъ катнасувшылары туьрли яслыгы ман эм кызыксынувлары ман баскаланса да, солай болып, халкымыздынъ маданиятынынъ оьрленуьвине артык маьне берген ногай миллет ваькиллерин бирге йыйды. Шара катнасувшыларынынъ сол куьн ногай халкымыздынъ тари-
хи, дини, маданияты, бай асханасы, адабияты эм аьел аьдетлери бойынша билимлери мен сынаспага амаллары болдылар. Ойын катнасувшылары,
кыйын болса да, бек кызыклы соравлары бойынша терен билимлерин коьрсетип, аьр бир соравга толы явапларын бермеге шалыстылар. Интеллектуаллык ойыны Сургут каласынынъ ыхтыяр, экономикалык управлениеси бойынша институтынынъ залында озды. Бу кызыклы ойында «Ногай Эл», «Ялгыз зарарлы боьри», «Карлыгашлар», «Масак», «Маьметекей», «Дослар» деген алты коман-
далары ортакшылык эттилер. Ойын катнасувшыларынынъ билимлерин сыйлы тоьрешилер тармак эм сетевой администрирования кафедрасынынъ етекшиси Асанбий Казмуханбетович Эспергенов, Сургут каласындагы ногай яслар союзын негизлендируьв-шилерининъ бириси, патриот Нурия Биярслановна Якубова, ясуьйкен, ис ветераны Фатима Маушевна Джалалова тийисли бааладылар.
Ойыннынъ тамамы бойынша бек тыпак эм бийик билимлери мен баскаланган командалары, айтпага, биринши сыйлы орынга – «Ногай Эл», экинши орынга «Ялгыз зарарлы боьри», уьшинши орынга «Карлыгашлар» командалары тийисли этилдилер.
Шарага йыйылганлардынъ коьнъиллерин Арсен Ашакаевтинъ етекшилиги астында «Дух Кавказа» ансамблининъ катнасувшылары «Тамгалар» деген биюви мен эм Зарина Дуйсембиева «Шешекейлер» деген йыры ман коьнъиллерин коькке дейим коьтерди. Сол куьн «Не зат? Кайда? Кашан?» деген интеллектуаллык ойынынынъ енъуьвшилери де эм онда ортакшылык эткен аьр бир катнасувшы да уьйлерине баргысыз кайтпадылар.
Сургут каласындагы ногай яслар Союзынынъ председатели Беккуват Болатовтынъ белгилевине коьре, ойынды озгарувда, савгалар алувда, халкымыздынъ атын яйылдырув исинде спонсорлык аьрекети ягыннан Заурбек Койлюбаев, Алия Озганбаева, Эмина Саитова, Али Баетов, Арсен Ашакаев, Мусаби Курманакаевте оьз уьлислерин костылар. Соьйтип билимлендируьв ойыны дослык аьлде эм йогары коьнъилде уйгынланып озды. Сондай кызыклы шараларды Сургут каласындагы ногай яслар союзы организациясы ман алдыда коьп кере озгарылып, яс несиллер арасында ана тилин, маданиятын, адабиятын, тарихин кенъ таралтып келеегине сеним этемиз.
Гульмира Нурдинова.
Суьвретте: шарадан коьринис.
