Россия куьни – ол энъ яс эм элимиздинъ маьнели патшалык байрамларынынъ бириси. Ол миллет бирлесуьвининъ, Элдинъ келеектегиси уьшин орталык яваплылык белгиси болады. Сол байрамга багысланып Ногай районынынъ Терекли-Мектеб авыл Патшалык халк саз алатлар оркестрининъ язгы клубы алдында «Яша сен, Россиям!» деген концерт йогары коьнъилде уйгынланып озды. Шара Россия Федерациясынынъ Патшалык гимниннен басланды. Байрамга йыйылганларды шарадынъ сыйлы конагы ДР Халк Йыйынынынъ депутаты Гасан Маликович Османов кутлады. Оьз кутлав соьзинде депутат Россия куьни – ол бирлесуьвдинъ эм коьпмиллетли элимиздинъ энъ маьнели шатлыклы шараларынынъ бириси деп белгиледи.
Депутат Г.Османов Украина еринде оьтетаган согыс спецоперацияда дагестанлылардынъ йигитлигин белгилеп, аьр кимди де оьз тувган ерин, элин суьймеге, оьз тамырларын билмеге, ортак онъайлыгына шалыспага шакырувын этти. Йыйылганлардынъ алдында Ногай районынынъ аькимбасынынъ орынбасары Мурат Юмадуевич Шадиев те кутлав соьзи мен шыгып соьйледи. Ол ДР Халк Йыйынынынъ депутатына районымыздынъ, Ногай халкынынъ маьселелерине айырым эс берип келгени уьшин уьйкен разылыгын билдирди. Ногай районынынъ аькимбасы эм район администрациядынъ ис коллективи атыннан яшавшыларды Россия куьни мен кутлай келип, оларга ден савлыкты, тынышлыкты, онъайлыкты йорады. Оннан сонъ байрамда Ногай патшалык халк саз алатлар оркестрининъ артистлери, айтпага, ДР Халк артисти Фатима Нурлубаева, ДР ат казанган артисти Зульфия Аджигеримова, Артур Межитов, Расиль Акбулатов, Равхан Султанова ногай эм орыс тиллеринде йырларын йырлавы ман йыйылганлардынъ коьнъиллерин коьтердилер. Баска болып программадынъ конагы Эрболат Ваисов эм шарадынъ энъ яс оьнерли йырлавшысы Роза Колебаева да йырлав оьнерлери мен боьлистилер. ДР ат казанган артисти Альмира Тунгатаровадынъ етекшилеви астында «Карлыгашлар» балалар хореографиялык ансамблининъ талаплы яс артистлери «Айданак», «Домбыра» биювлери мен де шарады ярасыкладылар.
Г.Нурдиннова.
Суьвретте: шарадан коьринис