Уьстимиздеги йылдынъ июнь айынынъ 10-15-нши куьнлеринде Москва каласында ВДНХ-да «Путешествуй» деп аталып туристлик форум оьткерилди. Сонда оьз майданын бизим республикамыз да курды эм Дагестаннынъ ярасыклыгын коьрсетпеге шалысты.

Дагестан Республикасынынъ Аькимбасы Сергей Меликов сол майданды уйгынлавшыларга оьзининъ разылыгын айтып, форумнынъ барысында бизим майданда конаклардынъ коьплигин белгиледи.
Элбетте, коьнъилди коьтерди конаклардынъ бизим ярасыклы Дагестаннынъ маданияты ман кызыксынувлары. Оьз ягыннан уйгынлавшылар да оларды кавказлы конаксуьерлиги мен аьвликтирип болдылар. Сол куьнлер ишинде мынълаган форум катнасувшылары дагестан асказаныннан берекет даьмин таттылар, художестволык кол усталыгыннан бир затларга уьйрендилер, мунда озгарылган коьплеген мастер-классларында катнастылар эм карс кактырган лезгинка биювин де бийип кеттилер.
Солай ок форумда туризмди оьрлендируьв уьшин бек маьнели йолыгыслар оздылар. Айтпага, Чувашия ман Дагестан арасында, элгезерлерге янъы маршрутлар ашар уьшин, ортак билдируьв турлар уйгынлав акында соьйлесилди.
Дагестан Республикасынынъ Аькимбасы форумда дагестанлы майданды уйгынлаганларга уьйкен савболсынын айтты:
– Сиз тагы да республикады федераллык дережеде тийисли кепте коьрсетип болдынъыз. А бизим ердинъ маданиятын коьрмеге келгенлерге – Дагестан Республикасы ман ерине келип таныспага маслагатымды беремен, мунда сизди бек кызыклы тыншаюв куьтеди, – деди ол.